ట్విటర్‌కు పోటీగా వచ్చిన 'కూ' మూసివేత

ట్విటర్‌కు పోటీగా వచ్చిన స్వదేశీ సోషల్‌ మీడియా ప్లాట్‌ఫామ్‌ 'కూ' మూతపడింది. ఆర్థిక ఇబ్బందులతో ఈ నిర్ణయం తీసుకున్నట్టు కో ఫౌండర్‌ మయాంక్‌ బిదావత్కా ప్రకటించారు. 2020లో దీన్ని స్థాపించగా.. దాదాపు 60 మిలియన్‌ డౌన్‌లోడ్‌లు జరిగాయి. 10కిపైగా భాషల్లో అందుబాటులో ఉన్న మొట్టమొదటి ఇండియన్‌ మైక్రోబ్లాగింగ్‌ సైట్‌గా ఇది గుర్తింపు పొందింది. ఈ యాప్‌ లోగో కూడా దాదాపు ట్విటర్‌ను పోలి (పక్షి) ఉంటుంది.

భాగస్వామ్య చర్చలు విఫలమైన తర్వాత స్వదేశీ మైక్రో-బ్లాగింగ్ ప్లాట్‌ఫామ్ కూ ప్రజలకు తన సేవలను నిలిపివేస్తున్నట్లు బుధవారం ప్రకటించింది. "మేము బహుళ పెద్ద ఇంటర్నెట్ కంపెనీలు, మీడియా సంస్థలతో భాగస్వామ్యాన్ని అన్వేషించాము, కానీ ఈ చర్చలు మేము కోరుకున్న ఫలితాన్ని ఇవ్వలేదు" అని కూ వ్యవస్థాపకులు అప్రమేయ రాధాకృష్ణ, మయాంక్ బిదావత్కా లింక్డ్‌ఇన్ పోస్ట్‌లో రాశారు.

టైగర్ గ్లోబల్ , యాక్సెల్ వంటి ప్రముఖ పెట్టుబడిదారుల నుండి $60 మిలియన్లకు పైగా నిధులను సంపాదించిన కూ, గత సంవత్సరంలో తన వినియోగదారుల సంఖ్యను విస్తరించడంలో, ఆదాయాన్ని సంపాదించడంలో గణనీయమైన సవాళ్లను ఎదుర్కొంది. ఫిబ్రవరిలో, మీడియా సంస్థ డైలీహంట్‌.. కూ ని కొనుగోలు చేయడానికి చర్చలు జరిపింది.