సీఎం చంద్రబాబు ప్రతిపాదనకు ఓకే చెప్పిన కేంద్రం

గోదావరి, పెన్నార్ నదుల అనుసంధానం చేయాలన్న ముఖ్యమంత్రి చంద్రబాబు నాయుడు ప్రతిపాదనకు కేంద్రం శుక్రవారం అంగీకారం తెలిపింది. రాజధాని అమరావతిని అభివృద్ధి చేయడంలో సింగపూర్ భాగస్వామ్యాన్ని పునరుద్ధరించాలని, పోలవరాన్ని త్వరితగతిన పూర్తి చేయాలనే సూచనకు కేంద్రం మద్దతు తెలిపింది.

ముఖ్యమంత్రి చంద్రబాబు నాయుడు శుక్రవారం సాయంత్రం దేశ రాజధానికి వెళ్లారు. కేంద్ర ఆర్థిక మంత్రి నిర్మలా సీతారామన్, విదేశాంగ మంత్రి డాక్టర్ ఎస్ జైశంకర్‌ను కలిశారు. చంద్రబాబు నాయుడు డిమాండ్ లకు మంత్రులిద్దరూ సానుకూలంగా స్పందించారు.

మీడియా ప్రతినిధులతో టీడీపీ ఎంపీ లావు కృష్ణదేవరాయలు మాట్లాడుతూ.. వెనుకబడిన రాయలసీమ, ఉమ్మడి ప్రకాశం జిల్లా అభివృద్ధికి గోదావరి, పెన్నార్ నదుల అనుసంధానం కీలకమని అన్నారు. కేంద్రం అందుకు గ్రీన్ సిగ్నల్ ఇచ్చిందని తెలిపారు. పోలవరం ప్రాజెక్టును పూర్తి చేసేందుకు రాష్ట్రానికి అన్ని విధాల సహకారం అందించేందుకు ఆర్థిక మంత్రి అంగీకరించారని కృష్ణదేవరాయలు తెలిపారు.

అమరావతి అభివృద్ధిలో సింగపూర్ భాగస్వామ్యాన్ని పునరుద్ధరించేందుకు విదేశాంగ మంత్రి కూడా అంగీకరించారని టీడీపీ ఎంపీ తెలిపారు. ఈజ్ ఆఫ్ డూయింగ్ బిజినెస్ స్థానంలో ఆంధ్రప్రదేశ్ ఇప్పుడు 'స్పీడ్ ఆఫ్ డూయింగ్ బిజినెస్'ని అనుసరించిందని విదేశీ వ్యవహారాల మంత్రికి ఏపీ సీఎం తెలియజేశారు. ఆంధ్రప్రదేశ్‌కు పెట్టుబడులను మళ్లించాలని జైశంకర్‌కు విజ్ఞప్తి చేశారు. పెట్టుబడిదారులను స్నేహపూర్వకంగా స్వాగతిస్తామని ముఖ్యమంత్రి హామీ ఇచ్చారని ఎంపీ తెలిపారు.

ఇటీవల కురిసిన భారీ వర్షాల కారణంగా విజయవాడ నగరం భారీగా నష్టపోయిందని, రాష్ట్రానికి ఎంతో ఊరటనిచ్చే జీఎస్టీలో ఒక్క శాతం సడలింపు ఇవ్వాలని ఆర్థిక మంత్రికి ముఖ్యమంత్రి విజ్ఞప్తి చేశారు. ఈ ప్రతిపాదనకు ఆమె అంగీకరించింది. కేంద్రం సానుకూలంగా స్పందించిందని ఎంపీ తెలిపారు.