నేచురల్ స్టార్ నాని.. ఒక‌ప్పుడు ఫ్లాప్ అనేది లేకుండా వ‌రుస‌గా ఆరేడు సినిమాల‌తో స‌క్సెస్ సాధించాడు. ఇలా స‌క్సెస్ ట్రాక్ లో వెళుతున్న నాని కెరీర్ కి ‘కృష్ణార్జున యుద్ధం’ బ్రేక్ వేసింది. ఆ తర్వాత నాగార్జున‌తో కలిసి ‘దేవ‌దాస్’ సినిమా చేసినా.. ఆశించిన స్థాయిలో ఆక‌ట్టుకోలేక‌పోయింది. ఇటీవల న‌టించిన ‘గ్యాంగ్ లీడ‌ర్’ సినిమా కూడా ఫ్లాప్ అయ్యింది. దీంతో క‌థ‌ల విష‌యంలో ఆచితూచి అడుగులు వేస్తున్న నాని ఓ డైరెక్ట‌ర్ చెప్పిన కథ న‌చ్చి ఓకే చెప్పాడ‌ట.
ఇంత‌కీ.. ఆ డైరెక్ట‌ర్ ఎవ‌రంటే… నందినీ రెడ్డి. నాని – నంద‌నీ రెడ్డి కాంబినేష‌న్ లో ‘అలా మొదలైంది’ రూపొందింది. ఈ సినిమాతో నాని హీరోగా మంచి గుర్తింపు సంపాదించుకున్నాడు. 2011లో విడుదలైన ఆ చిత్రం హీరోగా నాని ఎదుగుదలలో కీలక పాత్ర పోషించింది. ఆ సినిమా తర్వాత నందినీ రెడ్డి, నాని మళ్లీ కలిసి పని చేయలేదు. ఇప్పుడు ఇద్ద‌రూ కలిసి సినిమా చేస్తుండ‌డంతో ఈ ప్రాజెక్ట్ పై అంచ‌నాలు ఏర్ప‌డ్డాయి.
ఇటీవల ‘ఓ బేబీ’ సినిమాతో మంచి విజయం దక్కించుకున్న నందినీ.. నాని కోసం మంచి కథ సిద్ధం చేశారట. స్వప్నా సినిమాస్ బ్యానర్ పై స్వప్నాదత్, ప్రియాంకా దత్ ఈ సినిమాను నిర్మిస్తున్నారని తెలిసింది. ప్రస్తుతం ఈ చిత్రానికి సంబంధించిన ప్రీ-ప్రొడక్షన్ పనులు జరుగుతున్నాయట. త్వరలోనే ఈ సినిమా గురించి అఫిషియ‌ల్ గా ఎనౌన్స్ చేయ‌నున్నార‌ని తెలిసింది.
