ఎవరీ మాధవీ లత? చీనాబ్ రైల్వే బ్రిడ్జ్ కోసం 17 ఏళ్ల కృషి

ప్రపంచంలోనే అత్యంత ఎత్తైన రైల్వే వంతెన అయిన చీనాబ్ రైలు వంతెనకు సంబంధించిన దృశ్యాలను చూసి ప్రజలు మంత్రముగ్ధులు అవుతున్నారు. ఈ ఇంజనీరింగ్ అద్భుతం వెనుక ఓ మహిళ దృఢ సంకల్పం, నైపుణ్యం దాగున్నాయి. అంతేకాకూండా కశ్మీర్ ను భారత్ లోని భూభాగానికి మరింత దగ్గరయ్యేలా సాధ్యం చేయడంలో ఒక మహిళ పడిన కష్టం కూడా ఉంది.

కాశ్మీర్‌లో చీనాబ్ రైలు వంతెన నిర్మాణంలో కీలక పాత్ర పోషించిన జియోటెక్నికల్ నిపుణురాలు ప్రొఫెసర్ గాలి మాధవి లత గురించి మనం తెలుసుకుందాం. 17 సంవత్సరాల అంకితభావంతో సాగిన ఈ ప్రాజెక్ట్ కేవలం ఇంజనీరింగ్ ఘనత మాత్రమే కాదని ప్రతి ఒక్కరూ తెలుసుకోవాలి.

జమ్మూ కశ్మీర్‌లోని చీనాబ్ వంతెనను జూన్ 6న ప్రధాన మంత్రి నరేంద్ర మోదీ ప్రారంభించారు. 359 మీటర్ల ఎత్తులో, ఐఫిల్ టవర్ కంటే కూడా ఎత్తుగా ఉంటుంది చీనాబ్ వంతెన. కశ్మీర్‌ను రైలు ద్వారా భారతదేశంలోని మిగిలిన ప్రాంతాలకు కలుపుతుంది. ఇది అత్యాధునిక ఇంజనీరింగ్‌కు చిహ్నం. 2005లో, నార్తర్న్ రైల్వే.. ప్రొఫెసర్ లతను ప్రధాన జియోటెక్నికల్ కన్సల్టెంట్‌గా తీసుకువచ్చింది. ఎన్నో సవాళ్లతో కూడుకున్న పనిని ఎట్టకేలకు పూర్తీ చేసారు.

ఎవరీ మాధవీ లత?

ఆంధ్రప్రదేశ్‌కి చెందిన ఆమె 1992లో JNTU నుండి సివిల్ ఇంజనీరింగ్‌లో B.Tech పూర్తి చేశారు, ఆ తర్వాత NIT వరంగల్ నుండి జియోటెక్నికల్ ఇంజనీరింగ్‌లో M.Tech పూర్తి చేశారు. అక్కడ ఆమె బంగారు పతకం కూడా గెలిచారు. ఆ తర్వాత ఆమె 2000లో IIT మద్రాస్ నుండి PhD సంపాదించారు. ప్రస్తుతం ఆమె IISc బెంగళూరులో ప్రొఫెసర్‌గా పనిచేస్తున్నారు.

లత ప్రస్తుతం సెంటర్ ఫర్ సస్టైనబుల్ టెక్నాలజీస్ (CST) చైర్మన్ గా కూడా ఉన్నారు. ఈ ఫీల్డ్ లో ఆమె ఎన్నో విజయాలను, ప్రశంసలను అందుకున్నారు. 2021లో, లత ఇండియన్ జియోటెక్నికల్ సొసైటీ ద్వారా ఉత్తమ మహిళా జియోటెక్నికల్ పరిశోధకురాలు అవార్డును గెలుచుకున్నారు. ఆమె 2022లో భారతదేశంలోని STEAM (సైన్స్, టెక్నాలజీ, ఇంజనీరింగ్, ఆర్ట్స్ అండ్ మ్యాథమెటిక్స్)లో టాప్ 75 మహిళలలో ఒకరిగా నిలిచింది.

IIT మద్రాస్ నుండి జియోటెక్నికల్ ఇంజనీరింగ్‌లో PhD, IISc బెంగళూరు నుండి విస్తృతమైన పరిశోధన అనుభవం ఉన్న ప్రొఫెసర్ లతకు సంక్లిష్టమైన భూభాగం, రాక్ మెకానిక్స్‌ కొత్తేమీ కాదు. కానీ చీనాబ్ ప్రాంతంలో ఉన్న పరిస్థితులు మునుపెన్నడూ లేని విధంగా సవాళ్లతో కూడుకున్నది. వాటన్నింటినీ అధిగమించారు మాధవీ లత. ఎంతో ప్రమాదకరమైన మార్గాలలో ప్రయాణించారు. పడవల్లో నదులను దాటారు. పగిలిన రాళ్లను విశ్లేషించారు. ప్రమాదమన్నది ఐచ్ఛికం కాదని, అది ఉద్యోగంలో భాగమని నమ్ముతారు మాధవీ లత.

ఆమె విధానం విప్లవాత్మకమైనది. ప్రొఫెసర్ లత రియల్ టైమ్‌లో అక్కడి భూమి సవాళ్ళను స్వీకరించారు, ఆన్-సైట్‌లో కొత్త పద్ధతులకు మార్గదర్శకత్వం వహించారు. పర్వత వాలులను బలోపేతం చేయడానికి 66 కి.మీ కంటే ఎక్కువ యాంకర్‌లను చొప్పించడం ద్వారా సిమెంట్ గ్రౌటింగ్, రాక్ యాంకరింగ్‌తో కూడిన కార్యకలాపాలకు ఆమె నాయకత్వం వహించారు.

రాత్రుళ్లు కూడా సైట్‌లోనే:

త్రవ్వకాల బృందాలు అత్యంత అస్థిర భూభాగాలను ఎదుర్కొన్నప్పుడు ఆమె నిరంతరం సైట్‌లోనే ఉండి, కీలకమైన మార్గదర్శకత్వాన్ని అందించిన రాత్రులు ఎన్నో ఉన్నాయి. ఒక చిన్న తప్పు విపత్తుకు దారితీయవచ్చు. అందుకే ఎన్నో జాగ్రత్తలు తీసుకున్నారు.

వంతెన ఎన్నో కఠినమైన పరిస్థితులను తట్టుకునేలా రూపొందించారు. గంటకు 260 కి.మీ వేగంతో గాలి వేగం, 8 తీవ్రతతో భూకంపాలు వచ్చే ప్రాంతమది. ప్రొఫెసర్ లత జియోటెక్నికల్ వ్యూహాలు ఈ ప్రతిష్టాత్మక లక్ష్యాన్ని సాధించగలిగేలా చేశాయి.

వాలులను స్థిరీకరించడానికి రాక్ యాంకర్‌లను ఉంచడం, నిర్మాణం అంతటా నిర్మాణ భద్రతను నిర్ధారించడంపై సలహా ఇవ్వడం ఆమె బాధ్యతల్లో భాగమే!!

పిల్లలకు చూపించింది:

17 సంవత్సరాల కృషి తర్వాత, ఆమె 2022లో పూర్తయిన వంతెనను సందర్శించింది. ఈసారి కన్సల్టెంట్‌గా కాకుండా తల్లిగా!! తన కృషి ఫలితాన్ని తన పిల్లలకు గర్వంగా చూపించారు. 2021లో, ఆమెను ఇండియన్ జియోటెక్నికల్ సొసైటీ ఉత్తమ మహిళా జియోటెక్నికల్ పరిశోధకురాలిగా సత్కరించింది.

నిర్మాణ వారసత్వాలు:

ఆమె 2016 నుండి 2022 వరకు ఇండియన్ జియోటెక్నికల్ జర్నల్‌కు ఎడిటర్-ఇన్-చీఫ్‌గా పనిచేశారు. IIScలో తదుపరి తరం ఇంజనీర్లకు స్ఫూర్తినిస్తూనే ఉన్నారు. ప్రొఫెసర్ లతకు, ఇది కేవలం నిర్మించడం మాత్రమే కాదు.

జూన్ 4, 2025న, చీనాబ్ వంతెన తన మొదటి వందే భారత్ ఎక్స్‌ప్రెస్‌ను టెస్ట్ రన్ సమయంలో వారసత్వాన్ని స్వాగతించింది. ఇంజనీర్లు, రైల్వేలకు సంబంధించి గర్వించదగిన ఒక కల నిజమైంది. ఆ మైలురాయి వెనుక ప్రొఫెసర్ లత చేసిన పోరాటం, అచంచలమైన సంకల్పం ఉంది.

నేడు, చీనాబ్ వంతెన భారతీయ ఇంజనీరింగ్ ప్రపంచ చిహ్నంగా నిలుస్తుంది. దాని ప్రధాన భాగంలో అక్షరాలా పర్వతాలను కదిలించిన ఒక మహిళ కథ ఉంది. ప్రొఫెసర్ గాలి మాధవి లత. ఆమె ఎంతో మందికి స్ఫూర్తి ప్రదాత.

ప్రశంసల వెల్లువ:

ప్రధాని మోదీ చీనాబ్ వంతెనను ప్రారంభించిన వెంటనే, IISc ఆమెను ప్రశంసిస్తూ X లో ఓ పోస్టు పెట్టింది. "గౌరవనీయ ప్రధానమంత్రి నరేంద్ర మోదీ ప్రారంభించిన చీనాబ్ వంతెనకు ప్రొఫెసర్ మాధవి లత, ఆమె బృందం చేసిన కృషికి మేము గర్విస్తున్నాము. వాలుల స్థిరత్వం, పునాదుల రూపకల్పన, నిర్మాణం, ప్రమాదాలను తట్టుకునేలా యాంకర్లతో సహా వాలు స్థిరీకరణ వ్యవస్థల రూపకల్పనపై ఈ బృందం పనిచేసింది." అని తెలిపింది.

ఆంధ్రప్రదేశ్ ముఖ్యమంత్రి నారా చంద్రబాబు నాయుడు కూడా ప్రశంసల్లో ముంచెత్తారు. మరో తెలుగు కూతురు భారతదేశాన్ని గర్వపడేలా చేసింది! జూన్ 6న ప్రధానమంత్రి నరేంద్ర మోదీ ప్రారంభించిన చీనాబ్ నదిపై ప్రపంచంలోనే ఎత్తైన రైల్వే వంతెన వెనుక ఉన్న వ్యక్తులలో ఒకరైన ప్రొఫెసర్ జి. మాధవి లత గారికి వందనం చేస్తున్నానన్నారు నారా చంద్రబాబు. ఆంధ్రప్రదేశ్‌లోని ఒక చిన్న గ్రామానికి చెందిన ఆమె, ఈ నిర్మాణ అద్భుతాన్ని దేశం కోసం నిర్మించడానికి 17 సంవత్సరాల కృషి ఉంది. అంకితభావంతో పనిచేశారని అన్నారు చంద్రబాబు నాయుడు.సవాలుతో కూడిన భూభాగం, కఠినమైన వాతావరణ పరిస్థితులు ఉన్నప్పటికీ, ఈ అపూర్వమైన ప్రాజెక్టును పూర్తి చేసినందుకు ఇంజనీర్లు, నిర్మాణ కార్మికుల మొత్తం బృందాన్ని అభినందిస్తున్నానన్నారు ఏపీ సీఎం.