దేశ వ్యాప్తంగా కరోనా కాలరాస్తోంది. రోజురోజుకు పాజిటివ్ కేసుల సంఖ్య పెరిగిపోతున్నాయి. ఇక తాజాగా మధ్యప్రదేశ్‌లోని ఖార్గోన్‌ జిల్లా బార్గావ్‌ గ్రామంలో ఓ కటింగ్‌ షాపునకు వెళ్లిన ఆరుగురికి కరోనా పాజిటివ్‌ వచ్చింది. ఇటీవల ఇండోర్‌ నుంచి స్వస్థలానికి వచ్చిన ఓ యువకుడు ఏప్రిల్‌ 5న ఓ కటింగ్‌ సెలూన్‌కు వెళ్లినట్లు తెలుస్తోంది. ఆ తర్వాత అతడికి కరోనా పాజిటివ్‌ అని తేలింది. ఇక అదే షాపునకు వెళ్లిన మరో ఆరుగురు గ్రామస్తులకు కూడా కరోనా సోకినట్లు అధికారులు నిర్ధారించారు. ముందుగా కరోనా ఎలా సోకిందని ఆరా తీయగా, ఈ విషయం బయటపడింది. వారితో కాంటాక్టు ఉన్న 12 మందిని క్వారంటైన్‌కు తరలించారు. దీంతో అధికారులు గ్రామాన్ని సీజ్‌ చేశారు. వీరందరికి ఒకే టవల్‌, పనిముట్లు వాడటంతోనే కరోనా సోకినట్లు అధికారులు గుర్తించారు.

కాగా, మధ్యప్రదేశ్‌లో ఇప్పటి వరకూ 1952 కరోనా పాజిటివ్‌ కేసులు నమోదు కాగా, 92 మంది మృతి చెందారు. ఇక 210 మంది ఈ వైరస్‌ నుంచి కోలుకున్నారు.

సుభాష్ గౌడ్

నేను న్యూస్ మీటర్‌లో జర్నలిస్టుగా పని చేస్తున్నాను. గతంలో రిపోర్టర్‌గా, కంటెంట్ రైటర్‌, సబ్ ఎడిటర్‌గా భారత్‌ టుడే న్యూస్‌ ఛానల్‌, సూర్య, ఆంధ్రప్రభ, న్యూస్‌హబ్‌, ఏపీ హెరాల్డ్‌లలో పని చేశాను. జర్నలిజం పట్ల ఇష్టంతో నేను ఈ మార్గాన్ని ఎంచుకున్నాను.