'రాతి యుగానికి ఇరాన్.. ఆపైనే మా నిష్క్రమణ'.. డోనాల్డ్ ట్రంప్ సంచలన ప్రకటన!

మధ్యప్రాచ్యాన్ని కుదిపేస్తూ, ప్రపంచ ఇంధన విపణిని అతలాకుతలం చేస్తున్న ఇరాన్-అమెరికా యుద్ధం ముగింపు దశకు చేరుకున్నట్లు కనిపిస్తోంది. ఇరాన్‌పై సాగిస్తున్న సైనిక చర్యను మరో రెండు మూడు వారాల్లో ముగించే అవకాశం ఉందని అమెరికా అధ్యక్షుడు డోనాల్డ్ ట్రంప్ మంగళవారం సంచలన ప్రకటన చేశారు. వైట్ హౌస్‌లో జరిగిన మీడియా సమావేశంలో ఆయన మాట్లాడుతూ.. "మేము చాలా త్వరగా ఇక్కడి నుండి నిష్క్రమిస్తాం, బహుశా రెండు లేదా మూడు వారాల్లో ఇది జరగవచ్చు" అని స్పష్టం చేశారు. యుద్ధం ముగించడానికి ఇరాన్‌తో దౌత్యపరమైన ఒప్పందం కుదుర్చుకోవాల్సిన అవసరం లేదని ఆయన ఈ సందర్భంగా పేర్కొన్నారు.

అయితే, ఈ ఉపసంహరణకు ట్రంప్ ఒక కఠినమైన షరతును విధించారు. ఇరాన్ మళ్లీ అణ్వాయుధాలను అభివృద్ధి చేయలేనంతగా ఆ దేశాన్ని 'రాతి యుగం' (Stone Age) నాటి స్థితికి తీసుకెళ్లిన తర్వాతే అమెరికా వెనక్కి తగ్గుతుందని ఆయన వ్యాఖ్యానించారు. ఇరాన్ సామర్థ్యాన్ని పూర్తిగా దెబ్బతీసిన తర్వాతే శాంతి నెలకొంటుందని ఆయన ఉద్ఘాటించారు. ఈ అంశంపై మరింత స్పష్టత ఇచ్చేందుకు బుధవారం రాత్రి 9 గంటలకు (భారత కాలమానం ప్రకారం గురువారం ఉదయం 6:30 గంటలకు) ట్రంప్ జాతిని ఉద్దేశించి ప్రసంగించనున్నారు.

మరోవైపు, ఇరాన్ తన పంతాన్ని వీడటం లేదు. అమెరికా చేస్తున్న దాడులకు ప్రతీకారంగా ఏప్రిల్ 1 నుంచి అమెరికాకు చెందిన ప్రముఖ సాంకేతిక, పారిశ్రామిక దిగ్గజ సంస్థలను లక్ష్యంగా చేసుకుంటామని ఇరాన్ రివల్యూషనరీ గార్డ్స్ హెచ్చరించారు. ఈ జాబితాలో మైక్రోసాఫ్ట్, గూగుల్, ఆపిల్, ఇంటెల్, టెస్లా, బోయింగ్ వంటి 18 అంతర్జాతీయ సంస్థలు ఉన్నాయి. ఈ సంస్థల ప్రాంతీయ కార్యకలాపాలపై దాడులు చేస్తామని ఇరాన్ అధికారిక మీడియా ద్వారా హెచ్చరికలు జారీ చేసింది.

అమెరికా రక్షణ మంత్రి పీట్ హెగ్సెత్ మాట్లాడుతూ.. యుద్ధం వల్ల వేలాది మంది ప్రాణాలు కోల్పోవడమే కాకుండా ప్రపంచ ఆర్థిక వ్యవస్థ దెబ్బతింటోందని, శాంతి కోసం ఇరాన్‌తో ఒప్పందానికి ట్రంప్ ఇప్పటికీ సిద్ధంగా ఉన్నారని తెలిపారు. కానీ, ఇరాన్ విదేశాంగ మంత్రి అబ్బాస్ అరాగ్చీ మాత్రం అమెరికా రాయబారుల నుంచి తమకు సందేశాలు అందుతున్నాయని, అయితే వాటిని చర్చలుగా భావించలేమని స్పష్టం చేశారు. యుద్ధాన్ని ముగించే విషయంలో ఇరాన్ తన వైఖరిని మరింత కఠినతరం చేస్తోంది.