వరుసగా ఆరు భారీ భూకంపాలు.. 53 మందికిపైగా మృతి.. 62 మందికి గాయాలు

మంగళవారం ఉదయం టిబెట్‌లో రిక్టర్ స్కేలుపై 7.1 తీవ్రతతో ఆరు భూకంపాలు సంభవించాయి. ఈ ప్రకృతి వైపరీత్యం వల్ల 53 మందికి పైగా మరణించారు. భూకంపాలతో భారత్, నేపాల్, భూటాన్‌లోని పలు ప్రాంతాల్లో భవనాలు కుప్పకూలాయి. వార్తా సంస్థ రాయిటర్స్ ప్రకారం.. భూకంపం కారణంగా టిబెటన్ ప్రాంతంలో 53 మంది మరణించారు. మరో 62 మంది గాయపడినట్లు చైనా వార్తా సంస్థ జిన్హువా వెల్లడించింది. చైనా మీడియా ప్రకారం.. భూకంప కేంద్రం సమీపంలో అనేక భవనాలు కూడా కూలిపోయాయి. "డింగ్రీ కౌంటీ, దాని పరిసర ప్రాంతాలలో చాలా బలమైన ప్రకంపనలు సంభవించాయి. భూకంప కేంద్రానికి సమీపంలో ఉన్న అనేక భవనాలు కూలిపోయాయి" అని చైనీస్ స్టేట్ బ్రాడ్‌కాస్టర్ సీసీటీవీ తెలిపింది.

ఢిల్లీ- ఎన్‌సీఆర్‌, ఉత్తర భారతదేశంలోని వివిధ ప్రాంతాలలో, బీహార్ రాజధాని పాట్నా, రాష్ట్రంలోని ఉత్తర భాగంలోని పలు ప్రాంతాల్లో బలమైన ప్రకంపనలు సంభవించాయి. పశ్చిమ బెంగాల్, అస్సాం సహా ఈశాన్య రాష్ట్రాల్లో కూడా భూకంపం సంభవించింది. నేపాల్ రాజధాని ఖాట్మండులో బలమైన ప్రకంపనలు రావడంతో నివాసితులు ఇళ్ల నుంచి పరుగులు తీశారు. "నేను నిద్రపోతున్నాను, మంచం వణుకుతోంది. నా కుమారుడు మంచం కదుపుతున్నాడని నేను అనుకున్నాను, నేను పెద్దగా పట్టించుకోలేదు, కానీ కిటికీ కదలడం నాకు భూకంపం అని నిర్ధారించింది. వెంటనే ఇల్లు ఖాళీ చేసి తన బిడ్డతో ఓపెన్ గ్రౌండ్‌కి వెళ్లాను" అని ఖాట్మండు నివాసి మీరా అధికారి వార్తా సంస్థ ANIకి తెలిపారు.

నేషనల్ సెంటర్ ఫర్ సిస్మోలజీ ప్రకారం, నేపాల్-టిబెట్ సరిహద్దుకు సమీపంలో ఉన్న జిజాంగ్‌లో ఉదయం 6:35 గంటలకు మొదటి 7.1 తీవ్రతతో భూకంపం సంభవించింది. టిబెట్‌లోని రెండవ అతిపెద్ద నగరమైన షిగాట్సే నగరంలో 6.8 తీవ్రతను చైనా అధికారులు నమోదు చేశారు. అదే జిజాంగ్ ప్రాంతం నుండి 4.7, 4.9 తీవ్రతతో రెండు ప్రకంపనలు నమోదయ్యాయి. చైనా స్టేట్ బ్రాడ్‌కాస్టర్ CCTV ప్రకారం, గత ఐదేళ్లలో షిగాట్సే నగరానికి 200 కిలోమీటర్ల పరిధిలో 3 లేదా అంతకంటే ఎక్కువ తీవ్రతతో 29 భూకంపాలు సంభవించాయి, ఇవన్నీ మంగళవారం ఉదయం సంభవించిన దానికంటే చిన్నవి.