ఉగ్రవాద సంస్థ జైషేకు షాక్‌.. మసూద్ అజార్ సోదరుడు అనుమానాస్పద మృతి

జైషే మహమ్మద్ ఉగ్రవాద సంస్థ అధినేత మసూద్ అజహర్ సోదరుడు మహమ్మద్ తాహిర్ అన్వర్ పాకిస్థాన్‌లో మరణించాడు. అయితే అతని మరణానికి గల ఖచ్చితమైన కారణంపై ఇంకా స్పష్టత రాలేదు. తాహిర్ అన్వర్ గత కొంతకాలంగా జైషే మహమ్మద్ కార్యకలాపాల్లో చురుగ్గా పాల్గొంటున్నాడు. అతని మరణ వార్తను ఆ సంస్థ అధికారిక ఛానెల్ ధృవీకరించింది. సోమవారం అర్థరాత్రి బహవల్‌పూర్‌లోని జామియా మసీదు ఉస్మాన్ వలీలో అంత్యక్రియలు నిర్వహించనున్నట్లు సమాచారం. అనారోగ్యం లేదా ఇతర కారణాల గురించి ఎటువంటి అధికారిక ప్రకటన వెలువడకపోవడంతో అతని మరణంపై పలు అనుమానాలు వ్యక్తమవుతున్నాయి.

జైషే మహమ్మద్ సంస్థ భారత్‌పై జరిగిన అనేక ప్రధాన ఉగ్రదాడులతో సంబంధం కలిగి ఉంది. 2001 పార్లమెంటు దాడి, 2016 పఠాన్‌కోట్ వైమానిక స్థావరంపై దాడి, ఉరీ దాడి మరియు 2019 పుల్వామా దాడి వంటి ఘటనల వెనుక ఈ సంస్థ హస్తం ఉంది. ఈ దాడులకు ప్రతిస్పందనగా భారత సైన్యం పాకిస్థాన్‌లోని బహవల్‌పూర్‌లోని జైషే ప్రధాన కార్యాలయంపై పలుమార్లు దాడులు నిర్వహించింది. ఈ దాడుల్లో మసూద్ అజహర్ బంధువులు పలువురు మరణించినట్లు సమాచారం.

గత ఏడాది ఏప్రిల్ 22న పహల్గామ్‌లో జరిగిన ఉగ్రదాడికి ప్రతీకారంగా భారత్ చేపట్టిన 'ఆపరేషన్ సింధూర్' లో భాగంగా బహవల్‌పూర్‌లోని ఉగ్రవాద స్థావరాలను భారత దళాలు ధ్వంసం చేశాయి. ఈ దాడిలో మసూద్ అజహర్ సోదరి, ఆమె భర్త, మేనల్లుడు మరియు ఇతర బంధువులతో సహా సుమారు 10 మంది మరణించినట్లు జైషే సంస్థ గతంలోనే పరోక్షంగా అంగీకరించింది. తాజా ఘటనలో తాహిర్ అన్వర్ మరణం ఆ సంస్థకు మరో పెద్ద ఎదురుదెబ్బగా భావిస్తున్నారు.