కొలంబియాలో కుప్పకూలిన మిలిటరీ విమానం.. 66 మంది మృతి

దక్షిణ అమెరికా దేశమైన కొలంబియాలో సోమవారం ఒక భారీ విమాన ప్రమాదం చోటుచేసుకుంది. కొలంబియా వైమానిక దళానికి చెందిన లాక్హీడ్ మార్టిన్ హెర్క్యులస్ C-130 విమానం టేకాఫ్ అయిన కొద్దిసేపటికే అమెజాన్ అడవుల ప్రాంతంలో కుప్పకూలింది. ఈ ప్రమాదంలో కనీసం 66 మంది ప్రాణాలు కోల్పోయినట్లు సైనిక వర్గాలను ఉటంకిస్తూ రాయిటర్స్ వార్తా సంస్థ వెల్లడించింది. ప్రమాద సమయంలో విమానంలో మొత్తం 125 మంది (114 మంది ప్రయాణికులు, 11 మంది సిబ్బంది) ఉన్నట్లు సమాచారం.

టేకాఫ్ అయిన నిమిషాల్లోనే విషాదం

పెరూ సరిహద్దుకు సమీపంలోని 'పోర్టో లెగుజామో' వద్ద ఈ ప్రమాదం జరిగింది. విమానం రన్‌వే చివర టేకాఫ్ అవుతున్న సమయంలో దేనినో బలంగా ఢీకొట్టినట్లు తెలుస్తోంది. ఈ ప్రభావంతో విమానం ఒక రెక్క విరిగిపోయి చెట్టుకు తగిలిందని, వెనువెంటనే విమానంలో మంటలు చెలరేగి భారీ పేలుడు సంభవించిందని స్థానిక మీడియా పేర్కొంది. ప్రమాదం జరిగిన ప్రాంతం దట్టమైన అటవీ ప్రాంతం కావడంతో సహాయక చర్యలకు తీవ్ర ఆటంకం ఏర్పడింది. ఘటనా స్థలం నుండి దట్టమైన నల్లటి పొగ వెలువడుతున్న వీడియోలు సోషల్ మీడియాలో వైరల్ అయ్యాయి.

ఈ విమాన ప్రమాదం కొలంబియా సైన్యంలో ఉపయోగిస్తున్న పాత విమానాల భద్రతపై మరోసారి చర్చకు దారితీసింది. 1950ల కాలం నాటి హెర్క్యులస్ C-130 విమానాలను కొలంబియా 1960ల నుండి వాడుతోంది. కొన్ని విమానాలను ఆధునీకరించినప్పటికీ, నిర్వహణ లోపాలు మరియు పాతబడిపోవడం వల్ల ఇలాంటి ప్రమాదాలు జరుగుతున్నాయనే విమర్శలు వస్తున్నాయి. కొన్ని వారాల క్రితమే పొరుగు దేశమైన బొలీవియాలో కూడా ఇలాంటిదే ఒక విమానం కుప్పకూలి 20 మందికి పైగా మరణించారు.

ఈ ఘటనపై కొలంబియా అధ్యక్షుడు గుస్తావో పెట్రో తీవ్రంగా స్పందించారు. సైనిక విమానాల ఆధునీకరణలో జాప్యం చేస్తున్న అధికారులపై ఆయన ఆగ్రహం వ్యక్తం చేశారు. "ఇకపై ఎలాంటి జాప్యాన్ని సహించను, ఇక్కడ మన యువకుల ప్రాణాలు ముడిపడి ఉన్నాయి" అని ఆయన ఎక్స్ (X) వేదికగా పేర్కొన్నారు. విమానంలో నాసిరకం పరికరాలు (స్క్రాప్ మెటల్) వాడినట్లు కూడా ఆయన ఆరోపించారు. ఈ విమాన తయారీ లేదా మరమ్మతుల్లో పాలుపంచుకున్న కాంట్రాక్టర్ ఎవరనే దానిపై సమగ్ర విచారణ జరిపిస్తామని ఆయన స్పష్టం చేశారు.