చికెన్ టిక్కా మసాలా ఆవిష్కర్త అస్లాం అలీ కన్నుమూత

ప్రముఖ వంటకం చికెన్ టిక్కా మసాలాను కనిపెట్టిన ప్రముఖ చెఫ్‌ అహ్మద్‌ అస్లాం అలీ కన్నుమూశారు. యూకేలోని గ్లాస్గోకు చెందిన చెఫ్ అస్లాం అలీ తన 77వ ఏట సోమవారం నాడు మరణించారు. ఈ విషయాన్ని అతని మేనల్లుడు అండ్లీబ్ అహ్మద్ ఫేస్‌బుక్ పోస్ట్‌లో పంచుకున్నారు. చికెన్ టిక్కా మసాలా ఒక యూరోప్‌ వంటకం. ఇది అక్కడి ప్రదేశాలను సందర్శించే విదేశీయులకు ఇష్టమైనదిగా ప్రచారం చేయబడింది. పాకిస్తాన్‌లో జన్మించి గ్లాస్గోకు వెళ్లిన అస్లాం అలీ.. యూకేలోని ప్రామాణికమైన స్కాటిష్ కర్రీ హౌస్ అయిన శిష్ మహల్‌లో పనిచేస్తుండేవారు.

అలీ మ‌ర‌ణ వార్త‌ను రెస్టారెంట్ శిష్ మ‌హ‌ల్ ఫేస్బుక్ పేజీలో షేర్ చేసింది. అలాగే ఆయన మృతికి సంతాప సూచకంగా 48గంటల పాటు రెస్టారెంట్‌ను మూసి ఉంచారు. దీంతో పెద్ద‌సంఖ్య‌లో ప్ర‌జ‌లు ఆయనకు సంతాపం వ్య‌క్తం చేస్తున్నారు. బ్రిట‌న్ జాతీయ వంట‌కాల్లో ఒక‌టైన చికెన్ టిక్కా మ‌సాలా ఆవిష్క‌ర్త భౌతికంగా దూరం కావ‌డం బాధాక‌ర‌మ‌ని విచారం వ్య‌క్తం చేస్తున్నారు. అలీకి నివాళులు అర్పిస్తూ నెటిజ‌న్లు పెద్ద‌సంఖ్య‌లో పోస్ట్ చేశారు. అలీ రోజూ తన రెస్టారెంట్‌లో భోజనం చేసేవాడు. రెస్టారెంట్ అతనికి ప్రాణం కూడా.

రెస్టారెంట్‌లోని ఒక కస్టమర్ సాస్‌ని అడిగినప్పుడు, అలీ ఒక టిన్‌లో కండెన్స్‌డ్ టొమాటో సూప్, మసాలా దినుసుల నుండి సాస్‌ను తయారు చేసి చికెన్‌ టిక్కా మసాలా వంటకాన్ని తయారు చేశారు. చాలా మంది భారతీయులు.. ఇది భారతీయ మూలాలను కలిగి ఉన్న వంటకం అని చెప్పినప్పటికీ, అలీ కథ వేరే విధంగా సూచిస్తుంది. ఈ వంటకం బ్రిటిష్ రెస్టారెంట్లలో అత్యంత ప్రజాదరణ పొందిన వంటకంగా మారింది. 1970లలో తన రెస్టారెంట్‌లో చికెన్ టిక్కా మసాలా వంటకాన్ని ప్రారంభించారు.