పాకిస్తాన్‌లో ఆత్మాహుతి దాడి.. ఇద్దరు చైనా పౌరులు మృతి

అక్టోబర్ 6, ఆదివారం పాకిస్తాన్‌లోని కరాచీలోని జిన్నా అంతర్జాతీయ విమానాశ్రయం సమీపంలో జరిగిన భారీ పేలుడులో ఇద్దరు చైనా జాతీయులు మరణించారు. మరో 10 మంది గాయపడ్డారు. జిన్నా అంతర్జాతీయ విమానాశ్రయం వెలుపల ట్యాంకర్ పేలడంతో రాత్రి 11 గంటలకు (స్థానిక కాలమానం ప్రకారం) ఈ ఘటన జరిగిందని పాకిస్థాన్‌లోని చైనా రాయబార కార్యాలయం ఒక ప్రకటనలో తెలిపింది. ఈ క్లిష్ట సమయంలో గాయపడిన వారికి, వారి కుటుంబాలకు మేము మా ప్రగాఢ సానుభూతిని తెలియజేస్తున్నాము అని పాకిస్తాన్‌లోని చైనా రాయబార కార్యాలయం ఒక ప్రకటనలో తెలిపింది.

"పాకిస్తాన్‌లోని చైనీస్ ఎంబసీ, కాన్సులేట్ జనరల్ వెంటనే అత్యవసర ప్రణాళికను ప్రారంభించాయి, దాడిపై క్షుణ్ణంగా దర్యాప్తు చేయాలని, నేరస్థులను కఠినంగా శిక్షించాలని, చైనా పౌరులు, సంస్థలు, ప్రాజెక్టుల భద్రతను కాపాడేందుకు అవసరమైన అన్ని చర్యలు తీసుకోవాలని పాకిస్తాన్ పక్షాన్ని అభ్యర్థించాం’’ అని రాయబార కార్యాలయం పేర్కొంది.

ఈ సంఘటన తర్వాత, నిషేధిత సంస్థ బలూచిస్తాన్ లిబరేషన్ ఆర్మీ (BLA) కరాచీ విమానాశ్రయం నుండి వచ్చిన "చైనీస్ ఇంజనీర్లు, పెట్టుబడిదారుల ఉన్నత స్థాయి కాన్వాయ్‌ను లక్ష్యంగా చేసుకున్న" ఆత్మాహుతి బాంబు దాడికి బాధ్యత వహించింది. సింధ్ హోం మంత్రి జియావుల్ హసన్ లంజర్ జియో న్యూస్‌తో మాట్లాడుతూ, పేలుడు అనుమానాస్పదమైన ఇంప్రూవైజ్డ్ ఎక్స్‌ప్లోజివ్ డివైస్ (ఐఇడి) వల్ల సంభవించిందని, ఇందులో ఒక విదేశీయుడు కూడా గాయపడ్డాడని చెప్పారు.

స్థానిక మీడియా నివేదికల ప్రకారం.. నగరం అంతటా నివాసితులు పేలుడు శబ్దాన్ని విన్నారు. ఆ ప్రాంతం నుండి పొగలు కమ్ముకున్నాయి. పేలుడులో గాయపడిన వారిని వైద్య చికిత్స నిమిత్తం సమీపంలోని ఆసుపత్రికి తరలించారు.

టెలివిజన్ ఫుటేజీలో పేలుడు జరిగిన ప్రదేశానికి సమీపంలోని రహదారిపై పెద్ద మంటలు కనిపించడంతో ఆ ప్రాంతం నుండి పొగలు పైకి లేచాయి. ఉత్తర నజీమాబాద్, కరీమాబాద్ సహా నగరంలోని వివిధ ప్రాంతాల్లో పేలుడు శబ్దం వినిపించింది.

సాధారణంగా VIP ప్రోటోకాల్ వాహనాలు ఉపయోగించే విమానాశ్రయం సమీపంలో కొన్ని వాహనాలు తగలబడడంతో పేలుడు నుండి చెలరేగిన మంటలు వ్యాపించాయి. ఘటనా స్థలంలో ఉన్న మరో జర్నలిస్ట్ నివేదించిన ప్రకారం, విమానాశ్రయం నుండి బయటికి వెళ్లే రహదారిలో పేలుడు సంభవించింది.

ఈ ఏడాది మార్చిలో పాకిస్థాన్‌లోని ఖైబర్ పఖ్తుంఖ్వా ప్రావిన్స్‌లో ఆత్మాహుతి బాంబర్ పేలుడులో ఐదుగురు చైనా పౌరులు, స్థానికుడు మరణించారు. ఇస్లామాబాద్ నుండి దాసులోని వారి క్యాంపుకు వెళుతున్న చైనా ఇంజనీర్ల కాన్వాయ్‌పై ఆత్మాహుతి బాంబర్ పేలుడు పదార్థాలతో కూడిన వాహనాన్ని ఢీకొట్టడంతో ఈ సంఘటన జరిగింది.