Hyderabad: చాక్లెట్ల కవర్లలో బంగారం స్మగ్లింగ్‌.. ఇద్దరూ అరెస్ట్

హైదరాబాద్: స్మగ్లింగ్‌ను భగ్నం చేస్తూ మంగళవారం దుబాయ్ నుంచి వస్తున్న రాజీవ్ గాంధీ అంతర్జాతీయ విమానాశ్రయంలో ఇద్దరు ప్రయాణికుల నుంచి రూ.16.5 లక్షల విలువైన బంగారాన్ని హైదరాబాద్ కస్టమ్స్ అధికారులు స్వాధీనం చేసుకున్నారు. ప్యాసింజర్ ప్రొఫైలింగ్ ఆధారంగా, హైదరాబాద్ కస్టమ్స్‌కు చెందిన కస్టమ్స్ ఎయిర్ ఇంటెలిజెన్స్ బృందం మంగళవారం ఉదయం 8 గంటలకు ల్యాండ్ అయిన ఫ్లైట్ నంబర్ EK-526 ద్వారా దుబాయ్ నుండి వచ్చిన ఇద్దరు ప్రయాణికులను అడ్డగించింది. ప్రయాణికుల బ్యాగులను పరిశీలించగా చాక్లెట్ కవర్లలో చుట్టి ఉంచిన చాక్లెట్లలో బంగారం దాచి ఉంచినట్లు గుర్తించారు. అట్టపెట్టెలో ఉంచిన చాక్లెట్లలో మొత్తం 13 చిన్న చిన్న బంగారు ముక్కలు కనిపించాయి. స్వాధీనం చేసుకున్న బంగారం విలువ 16.5 లక్షల రూపాయలు, 269 గ్రాముల బరువు ఉంటుంది. తదుపరి విచారణ పురోగతిలో ఉంది.