నుమాయిష్ లేడీస్‌ డే.. ఇవాళ మహిళలకు మాత్రమే అనుమతి

హైదరాబాద్‌లోని ప్రముఖ వార్షిక ట్రేడ్ ఫెయిర్ నుమాయిష్ జనవరి 10 మంగళవారం మహిళల కోసం ప్రత్యేకంగా తెరవబడుతుంది. 'లేడీస్ డే' అని పిలువబడే ఈ రోజున 10 సంవత్సరాల కంటే ఎక్కువ వయస్సు ఉన్న పురుషులు,అబ్బాయిలను నుమాయిష్ లోపలికి అనుమతించరు. 1940లో, హైదరాబాద్‌లోని చివరి నిజాం మీర్ ఉస్మాన్ అలీఖాన్ ఈ దినోత్సవాన్ని ప్రారంభించారు. గతంలో ప్రతి మంగళవారం మహిళా దినోత్సవం జరిగేది. అయితే, పగటిపూట సందర్శకుల సంఖ్య తగ్గడం చూసి, మొత్తం వార్షిక ప్రదర్శనలో ఒక రోజు మాత్రమే కేటాయించాలని నిర్ణయించారు.

45 రోజుల పాటు ప్రదర్శన

ఈ సంవత్సరం నాంపల్లిలోని నుమాయిష్ మైదాన్‌లో 45 రోజుల పాటు జరిగే వార్షిక ప్రదర్శన కోసం 2,400 స్టాల్స్‌ను ఏర్పాటు చేశారు. ప్రతిరోజూ మధ్యాహ్నం 3.30 గంటల నుంచి రాత్రి 10.30 గంటల వరకు ఎగ్జిబిషన్ సందర్శకుల కోసం తెరిచి ఉంటుంది. ఆల్ ఇండియా ఇండస్ట్రియల్ ఎగ్జిబిషన్ సొసైటీ (AIIES) దేశంలోని వివిధ ప్రాంతాలకు చెందిన వ్యాపారులు, వివిధ వ్యాపార సంస్థలకు తమ ఉత్పత్తులను ఈ మేళాలో విక్రయించడానికి స్టాల్స్‌ను కేటాయించింది.

నిర్వాహకులు ఈ ఏడాది ప్రవేశ రుసుమును రూ.30 నుంచి రూ.40కి పెంచారు. గ్రౌండ్ అంతటా ఉచిత Wi-Fi అందించడానికి, సొసైటీ BSNLతో జతకట్టింది.

హైదరాబాద్‌లో నుమాయిష్ చరిత్ర

Numaish-e-Masnuaat-e-Mulki, లేదా క్లుప్తంగా Numaish, 1938లో స్థానికంగా ఉత్పత్తి చేయబడిన వస్తువులను ప్రోత్సహించడానికి ఒక కార్యక్రమంగా ప్రారంభించబడింది. ఉస్మానియా యూనివర్శిటీకి చెందిన గ్రాడ్యుయేట్ల బృందం రాష్ట్ర ఆర్థిక సర్వేను నిర్వహించడానికి ఎగ్జిబిషన్ ఆలోచనతో ముందుకు వచ్చింది. హైదరాబాద్ స్టేట్ ఏడవ నిజాం మీర్ ఉస్మాన్ అలీఖాన్ మొదటి 'నుమాయిష్'ని ప్రారంభించారు. మంచి స్పందన రావడంతో ఉత్సాహంగా దీన్ని వార్షిక కార్యక్రమంగా నిర్వహించి, వచ్చే ఆదాయాన్ని విద్యాభివృద్ధికి వినియోగించాలని నిర్ణయించారు.

కేవలం 50 స్టాల్స్, రూ. 2.50 మూలధనంతో ప్రారంభమైన ఇది నేడు దేశంలోని అతిపెద్ద పారిశ్రామిక ప్రదర్శనలలో ఒకటిగా పరిణామం చెందింది. భారతదేశానికి స్వాతంత్ర్యం వచ్చిన తరువాత ఏర్పడిన గందరగోళం కారణంగా 1947, 1948లో నుమాయిష్ నిర్వహించబడలేదు. హైదరాబాద్ ఇండియన్ యూనియన్‌లో చేరడంతో.. 1949లో ఈ కార్యక్రమం పుంజుకుంది. కోవిడ్-19 పరిస్థితి కారణంగా 2020లో ఎగ్జిబిషన్ నిర్వహించడం సాధ్యం కాలేదు. నుమాయిష్‌ చరిత్రలో మూడోసారి మాత్రమే ఎగ్జిబిషన్‌ నిర్వహించబడలేదు.

ప్రతిరోజు 45 వేల మంది సందర్శిస్తున్న ఈ ఎగ్జిబిషన్‌లో దేశంలోని వివిధ ప్రాంతాలకు చెందిన వ్యాపారులు తమ స్టాల్స్‌ను ఏర్పాటు చేశారు. 2019లో 20 లక్షల మంది సందర్శకులు ఎగ్జిబిషన్‌ను సందర్శించారు.