కేంద్ర ప్రభుత్వం వల్లే.. ఉప్పల్‌, అంబర్‌పేట ఫ్లైఓవర్ల పనుల్లో జాప్యం: మంత్రి కేటీఆర్‌

హైదరాబాద్ నగరంలోని ఉప్పల్, అంబర్‌పేట్ ఫ్లైఓవర్ పనుల పూర్తిలో జాప్యంపై తెలంగాణ ఎంఏ అండ్ యుడి శాఖ మంత్రి కెటి రామారావు (కెటిఆర్) ఆదివారం కేంద్ర ప్రభుత్వంపై మండిపడ్డారు. ఈ అంశంపై ట్విట్టర్ యూజర్ అడిగిన ప్రశ్నకు సమాధానంగా కేటీఆర్ ఈ వ్యాఖ్యలు చేశారు. '' కేటీఆర్‌ సార్.. ఉప్పల్ ఫ్లైఓవర్ ఎప్పుడు పూర్తవుతుందని ఆశించవచ్చు. పనులు నెమ్మదిగా సాగుతున్నాయి. నారపల్లి నుంచి రోజూ రాకపోకలు సాగించే వారికి చాలా ఇబ్బందులు ఎదురవుతున్నాయి'' అని సందీప్ అనే ట్విట్టర్ యూజర్ మంత్రిని కోరారు. దీనిపై కేటీఆర్ స్పందిస్తూ.. రెండు ఫ్లై ఓవర్ల పనులు దురదృష్టవశాత్తు జాతీయ రహదారుల ద్వారానే జరుగుతున్నాయని అన్నారు.

''దురదృష్టవశాత్తు ఉప్పల్, అంబర్‌పేట్ ఫ్లైఓవర్‌ల నిర్మాణంను జాతీయ రహదారుల ద్వారా అమలు చేస్తున్నారు. జీహెచ్‌ఎంసీ భూసేకరణను నిబద్ధతతో పూర్తి చేసినా రెండూ ప్రాజెక్టులు నత్తనడకన సాగుతున్నాయి. మనం 35 ప్రాజెక్టులు పూర్తి చేసినా 2 కూడా పూర్తి చేయలేకపోతున్నాయి!! కేసీఆర్ ప్రభుత్వానికి మోదీ ప్రభుత్వానికి ఉన్న తేడా అదే'' అని మంత్రి కేటీఆర్ ట్వీట్ చేశారు. నిన్న స్ట్రాటజిక్ రోడ్ డెవలప్‌మెంట్ ప్లాన్ (ఎస్‌ఆర్‌డిపి)లో భాగంగా గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) ఎల్‌బినగర్ ఆర్‌హెచ్‌ఎస్ (కుడి వైపు) ఫ్లైఓవర్‌ను మంత్రి కేటీఆర్‌ ప్రారంభించిన విషయం తెలిసిందే.