ఉప్పల్‌ స్టేడియంలో మెస్సీ మ్యాచ్‌.. టికెట్ల అమ్మకాలు షురూ!

హైదరాబాద్‌: ఫుట్‌బాల్‌ స్టార్‌ లియోనెల్ మెస్సీ మ్యాచ్‌కు హైదరాబాద్‌ నగరం సిద్ధమవుతోంది. డిసెంబర్‌ 13న ప్రభుత్వం ఉప్పల్‌ రాజీవ్‌గాంధీ ఇంటర్నేషనల్‌ స్టేడియంలో నిర్వహించే ఈ మ్యాచ్‌ టికెట్ల విక్రయం ప్రారంభమైంది. స్టార్టింగ్‌ ధర రూ.1750 కాగా గరిష్ఠంగా రూ.30 వేల వరకు ఉన్నాయి. ప్రస్తుతం రూ.2,000, రూ.3,250, రూ.5,000, రూ.7,000, రూ.8,000, రూ.13,500 కేటగిరీల్లో టికెట్లు అందుబాటులో ఉన్నాయి.

రూ.30 వేల టికెట్‌ బుక్‌ చేసుకున్న వారికి హాస్పిటాలిటీ ఫెసిలిటీ కల్పించనున్నారు. డిస్ట్రిక్‌ జొమాటో యాప్‌లో టికెట్లు కొనుగోలు చేయవచ్చు. మెస్సీ మ్యాచ్‌ కావడంతో సెలబ్రిటీలు భారీగా తరలివచ్చే అవకాశం ఉంది. మెస్సీకి ఉన్న ఫాలోయింగ్‌ దృష్టిలో పెట్టుకుని నిర్వాహకులు భారీ ఏర్పాట్లు చేస్తున్నారు.

''భారత అభిమానానికి కృతజ్ఞతలు. మరికొన్ని రోజుల్లో భారత్‌కు రాబోతున్నాను. నా పర్యటనలో కోల్‌కతా, ముంబై, ఢిల్లీతో పాటు హైదరాబాద్‌ జత చేరింది. సీ యూ సూన్‌ ఇండియా'' అంటూ మెస్సీ సోషల్‌మీడియాలో పోస్ట్‌ చేశాడు. ‘G.O.A.T టూర్‌ టు ఇండియా 2025’లో భాగంగా మెస్సీ వచ్చే నెలలో భారత్‌కు రాబోతున్నాడు. భారత్‌లో హైదరాబాద్‌ సహా కోల్‌కతా, ముంబై, ఢిల్లీ నగరాల్లో మెస్సీ పర్యటించనున్నాడు. తొలుత కోల్‌కతాకు వెళ్లనున్న ఈ అర్జెంటీనా సాకర్‌ స్టార్‌ ఆ తర్వాత హైదరాబాద్‌, ముంబై, ఢిల్లీలో అభిమానులను అలరించనున్నాడు.