FactCheck: పీలే కాళ్లను మ్యూజియంలో పెట్టాలని ఫీఫా భావించిందా..?

సాకర్‌ చరిత్రలోనే అత్యంత మేటి ఆటగాడిగా గుర్తింపు పొందిన పీలే (82) డిసెంబర్‌ 30వ తేదీన అనారోగ్యంతో మృతి చెందారు. సావోపాలోలోని ఆల్బర్ట్‌ ఐన్‌స్టీన్‌ ఆసుపత్రిలో చికిత్స పొందుతూ తుదిశ్వాస విడిచారు. 21 ఏండ్ల సుదీర్ఘ కెరీర్‌లో మూడు ప్రపంచకప్‌లు బ్రెజిల్ కు అందించారు పీలే. 1363 మ్యాచ్‌లాడి 1281 గోల్స్‌ చేశారు. బ్రెజిల్‌ జాతీయ జట్టు తరఫున 92 అంతర్జాతీయ మ్యాచ్‌లాడిన పీలే.. అందులో 77 గోల్స్‌ నమోదు చేశారు. ఫిఫా ప్రపంచకప్‌ను మూడుసార్లు గెలిచిన జట్టులో ఉన్న ఏకైక ఆటగాడిగా చరిత్రకెక్కాడు పీలే.

దిగ్గజ ఫుట్‌బాల్ క్రీడాకారుడు పీలే పాదాలను మ్యూజియంలో ఉంచాలని ఫిఫా యోచిస్తోందని సోషల్ మీడియా వినియోగదారులు పేర్కొంటున్నారు.

అందుకు పీలే కుటుంబం కూడా అనుమతి ఇచ్చిందని వైరల్ పోస్ట్ కూడా పేర్కొంది.

ఫుట్‌బాల్ ఆటగాడు పీలే 82 సంవత్సరాల వయస్సులో మరణించిన నేపథ్యంలో, జ్యూరిచ్‌లోని మ్యూజియంలో FIFA తన పాదాలను ఉంచాలని యోచిస్తున్నట్లు సోషల్ మీడియాలో ఒక పోస్ట్ విస్తృతంగా ప్రచారం అవుతోంది.

పోస్ట్‌ని చూడటానికి ఇక్కడ క్లిక్ చేయండి.

నిజ నిర్ధారణ:

న్యూస్‌మీటర్ బృందం సోషల్ మీడియా క్లెయిమ్‌లకు మద్దతు ఇవ్వడానికి ఎలాంటి ఆధారాలు కనుగొనలేకపోయింది.

మేము FIFA అధికారిక వెబ్‌సైట్, అధికారిక సోషల్ మీడియా హ్యాండిల్‌ను తనిఖీ చేయడం ద్వారా మా దర్యాప్తును ప్రారంభించాము. మ్యూజియంలో పీలే పాదాలను భద్రపరచడానికి సంబంధించి మేము ఎలాంటి వార్తను కూడా కనుగొనలేకపోయాము.

మరింత స్పష్టత కోసం, మేము కీవర్డ్‌లను ఉపయోగించి సెర్చ్ నిర్వహించాము. కానీ వాటికి సంబంధించిన విశ్వసనీయమైన మీడియా సంస్థల నుండి ఎటువంటి సంబంధిత ఫలితాలను కనుగొనలేకపోయాము.

అంతేకాకుండా అందుకు సంబంధించి కుటుంబం అనుమతి ఇచ్చిందనే దావాకు మద్దతు ఇవ్వడానికి విశ్వసనీయ మూలం కూడా కనిపించలేదు.

పీలే ఇప్పటికే ఆటలోని ఇతర దిగ్గజాలతో పాటు రియోలోని మరకానా హాల్ ఆఫ్ ఫేమ్‌లో భాగంగా తన పాదముద్రలను ఉంచాడు.

అంతేకానీ.. FIFA తన మ్యూజియంలో పీలే పాదాలను ఉంచే ఆలోచనలో లేదు.

ఇక పీలే అంత్యక్రియలు పూర్తయ్యాయి. కుటుంబ సభ్యులు, అభిమానులు పీలేకు కడసారి వీడ్కోలు పలికారు. విలా బెల్మిరో స్టేడియంలో పీలే భౌతికకాయాన్ని వేలమంది అభిమానులు, స్థానికులు సందర్శించి నివాళులర్పించారు. బ్రెజిల్‌ దేశాధ్యక్షుడు లూయిస్‌ ఇనాసియో లలూ.. పీలే మృతదేహం వద్ద శ్రద్ధాంజలి ఘటించారు. పీలే అంతిమ యాత్రకు వేలాది మంది బ్రెజిల్‌ ప్రజలు తరలివచ్చి తమ అభిమాన ఆటగాడికి కడసారి కన్నీటి వీడ్కోలు పలికారు. సాంటోస్‌ వీధుల గుండా పీలే అంతిమయాత్ర కొనసాగింది.

పీలే కాళ్లను మ్యూజియంలో పెట్టాలని ఫీఫా భావించిందనే పోస్టులలో ఎటువంటి నిజం లేదు.