నిజమెంత: బంగ్లాదేశ్‌లో తన కుమార్తె అపహరణను నిరసిస్తున్న ఒక హిందూ వ్యక్తిపై దాడి చేశారా?

ఒక వ్యక్తిపై ఓ గుంపు దాడి చేస్తున్నట్లు చూపించే వీడియో సోషల్ మీడియాలో వైరల్ అవుతోంది. హరధన్ రాయ్ అనే హిందూ వ్యక్తి తన కుమార్తె అపహరణపై నిరసనలు వ్యక్తం చేస్తున్నందుకు ముస్లిం వ్యక్తులు అతనిపై దాడి చేశారనే వాదనలు ఉన్నాయి.

"బంగ్లాదేశ్‌లోని నవోగావ్‌లో అంజనా రాయ్ అనే హిందూ అమ్మాయిని ముస్లిం వ్యక్తి అబ్దుల్ హకీమ్ అపహరించాడు. ఆమె తండ్రి హరధన్ రాయ్ నిరసన తెలిపినప్పుడు, అతన్ని రాడికల్ ముస్లింలు కొట్టి గాయపరిచారు. హిందూ అమ్మాయిని రక్షించడానికి ఇప్పటివరకు ఎవరూ ముందుకు రాలేదు." అంటూ ఆ పోస్టుల్లో తెలిపారు. (ఆర్కైవ్)

నిజ నిర్ధారణ:

వైరల్ అవుతున్న వాదనలో ఎలాంటి నిజం లేదని న్యూస్‌మీటర్ బృందం కనుగొంది. వైరల్ వీడియోలో దెబ్బలు తింటున్న వ్యక్తి అవామీ లీగ్ నాయకుడు నిర్మలేందు దాస్ రాణా. రాజకీయ కారణాల వల్ల అతనిపై దాడి జరిగింది.

కీఫ్రేమ్‌లను తీసుకుని రివర్స్ ఇమేజ్ సెర్చ్ చేయగా మే 14న ఫేస్‌బుక్ ఖాతాలో పోస్ట్ చేసిన నిడివి ఎక్కువ ఉన్న వీడియో మాకు లభించింది.

పోస్ట్ ప్రకారం, అవామీ లీగ్ నాయకుడు నిర్మలేందు దాస్ రాణాపై మే 13న బంగ్లాదేశ్‌లోని సిల్హెట్‌లో ఒక గుంపు దాడి చేసినట్లు వీడియో చూపిస్తుంది. రాణాను కొట్టి, తరువాత పోలీసులకు అప్పగించారు. ఓ విద్యార్థి సంఘం దాడి చేసింది.

దీన్ని క్యూగా తీసుకొని, మేము కీవర్డ్ సెర్చ్ ను నిర్వహించాము. బంగ్లాదేశ్ మీడియా సంస్థలు రూపాలి బంగ్లాదేశ్, అనుసంధన్ 24 మే 14న ప్రచురించిన నివేదికలను కనుగొన్నాము.

ఈ నివేదికల ప్రకారం, కొత్వాలి మోడల్ పోలీస్ స్టేషన్ ఆఫీసర్-ఇన్-ఛార్జ్ ఎండి.జియావుల్ హక్ మాట్లాడుతూ దాడి చేసిన తర్వాత విద్యార్థులు, ప్రజలు నిర్మలేందు దాస్ రాణాను పోలీస్ స్టేషన్‌కు తీసుకువచ్చారని ధృవీకరించారు. జూలై-ఆగస్టు 2024 ఉద్యమంలో పాల్గొన్న విద్యార్థులపై జరిగిన దాడులకు సంబంధించిన కేసులో రాణా నిందితుడిగా ఉన్నాడు.

మే 14న బంగ్లాదేశ్ మీడియా సంస్థ దేశ్ టీవీ న్యూస్ నివేదించిన సంఘటనలో అవామీ లీగ్ నాయకుడు రాణాను ఒక గుంపు కొట్టి పోలీసులకు అప్పగించిందని కూడా మేము కనుగొన్నాము.

బంగ్లాదేశ్‌లోని నవోగావ్‌లో అంజనా రాయ్ అనే హిందూ బాలికను అబ్దుల్ హకీమ్ అపహరించగా నిరసనలకు దిగిన ఆమె తండ్రి హరధన్ రాయ్‌ను రాడికల్ ముస్లింలు దాడి చేశారనే నిర్దిష్ట సంఘటనను ధృవీకరించే విశ్వసనీయ నివేదికలు, ఆధారాలు మాకు దొరకలేదు.

కాబట్టి, బంగ్లాదేశ్‌లో తన కుమార్తె అపహరణను నిరసిస్తున్నందుకు ఒక హిందూ వ్యక్తిపై దాడి జరిగిందనే వాదన అబద్ధమని నిర్ధారించాము.

Credit: Mahfooz Alam