నిజమెంత: పప్పు యాదవ్ లారెన్స్ బిష్ణోయ్‌కి విధేయత ప్రకటించలేదు. వైరల్ న్యూస్ కార్డ్‌ను ఎడిట్ చేశారు.

లారెన్స్ బిష్ణోయ్ గ్యాంగ్ ఎన్‌సిపి నాయకుడు బాబా సిద్ధిఖీని హత్య చేసినట్లుగా ప్రకటించిన సంగతి తెలిసిందే. ఈ ఘటన దేశ వ్యాప్తంగా సంచలనం గా మారింది. బీహార్‌కు చెందిన పూర్నియా ఎంపీ పప్పు యాదవ్ లారెన్స్ బిష్ణోయ్‌కి బహిరంగంగా సవాలు విసిరారు. అవకాశం దొరికితే 24 గంటల్లోనే బిష్ణోయ్ నేర నెట్‌వర్క్‌ను నాశనం చేస్తానని తేల్చి చెప్పారు. లారెన్స్‌ను పైసాకు పనికిరాని గ్యాంగ్‌స్టర్‌ అని విమర్శిస్తూ తనకు అవకాశం ఇస్తే 24 గంటల్లో ఆ ముఠాను రూపుమాపుతానంటూ బహిరంగంగా సవాలు విసిరారు.

హీరో సల్మాన్‌ఖాన్‌కు మద్దతుగా మాట్లాడినందుకు చంపేస్తామని, ఈ విషయాల్లో జోక్యం చేసుకోకూడదని బిష్ణోయ్ గ్యాంగ్ మెంబర్ ఒకరు లారెన్స్ బిష్ణోయ్ ను హెచ్చరించారు. దాంతో పప్పూ యాదవ్‌ బిహార్‌ డీజీపీకి ఫిర్యాదు చేశారు. ఓ అజ్ఞాత వ్యక్తి ఫోన్‌లో మాట్లాడుతూ ప్రస్తుతం గుజరాత్‌లోని సబర్మతి జైలులో ఉన్న లారెన్స్‌ బిష్ణోయ్‌ అక్కడి నుంచే వ్యవహారాలు నడుపుతున్నట్టు చెప్పాడు. ఆయనపై అన్న మాటలను వెనక్కి తీసుకోవాలని, ఇందుకు అవసరమైతే ‘భాయ్‌’తో మాట్లాడే అవకాశం కల్పిస్తానని పప్పూ యాదవ్‌కు చెప్పాడు.

ఈ నేపథ్యంలో, పప్పు యాదవ్ లారెన్స్ బిష్ణోయ్‌కు విధేయత చూపారని, బిష్ణోయ్‌పై బెదిరింపులకు పాల్పడేలా ఒక జర్నలిస్టు తనను రెచ్చగొట్టాడని పేర్కొంటూ డిబి లైవ్ అనే డిజిటల్ న్యూస్ ఛానెల్ రిపోర్టు చేసింది.

“జర్నలిస్ట్ రెచ్చగొట్టడం వల్ల, నేను లారెన్స్ భాయ్‌ని బెదిరించాను, కానీ వాస్తవానికి, నేను లారెన్స్ భాయ్‌కి విధేయుడిని. రేపటి నుండి, ఆ నీచమైన జర్నలిస్ట్ ను ఇబ్బంది పెట్టబోతున్నాను, ”అని DB లైవ్ ఒక న్యూస్ కార్డ్‌లో యాదవ్‌ వ్యాఖ్యల ఫోటో ఉంది. ఒక సోషల్ మీడియా వినియోగదారు X.(ఆర్కైవ్)లో న్యూస్ కార్డ్‌ని షేర్ చేసారు.

నిజ నిర్ధారణ:

వాస్తవ తనిఖీ

ఈ న్యూస్ కార్డ్ ఎడిట్ చేసి ఉండడంతో వైరల్ అవుతున్న వాదనలో ఎలాంటి నిజం లేదని NewsMeter కనుగొంది. అసలు న్యూస్ కార్డ్ యాదవ్ జార్ఖండ్‌లోని దళితులు, ఆదివాసీల గురించి మాట్లాడుతున్నట్లు చూడొచ్చు.

పప్పు యాదవ్ లారెన్స్ బిష్ణోయ్‌కి విధేయతను ప్రకటించాడా అని తెలుసుకోడానికి మేము కీవర్డ్ శోధనను నిర్వహించాము, కానీ సంబంధిత వార్తా కథనాలు ఏవీ కనుగొనబడలేదు. అదనంగా, DB లైవ్ YouTube ఛానెల్ లో అటువంటి నివేదిక కనుగొనలేకపోయాము.

వైరల్ న్యూస్ కార్డ్ ప్రామాణికతను ధృవీకరించడానికి, మేము ఛానెల్ X ఖాతాలోని అన్ని పోస్ట్‌లను పరిశీలించాము. వైరల్ ఫోటోలో వ్యత్యాసాలను కనుగొన్నాము.

మీడియా అవుట్‌లెట్ వారి న్యూస్ కార్డ్‌లలో ఉపయోగించే ఫాంట్, వైరల్ న్యూస్ కార్డ్‌లోని ఫాంట్ భిన్నంగా ఉంది. అదనంగా, న్యూస్ కార్డ్‌కి కుడివైపు ఎగువన ఉన్న ‘7870’ సంఖ్య మరిన్ని అనుమానాలను లేవనెత్తింది. మీడియా అవుట్‌లెట్ X ఖాతాలోని న్యూస్ కార్డ్‌లపై సంఖ్యలు లేవు.

మేము పప్పు యాదవ్‌పై అవుట్‌లెట్ చేసిన ఒక న్యూస్ కార్డ్‌ని మాత్రమే కనుగొన్నాము, అందులో వైరల్ కార్డ్‌లో చూసినట్లుగా అదే చిత్రం ఉంది. ఒరిజినల్ న్యూస్ కార్డ్‌లో పప్పు యాదవ్ చెప్పిన హిందీ కోట్ ఉంది. జార్ఖండ్‌లోని దళితులు, ఆదివాసీలు రాహుల్ గాంధీ వెన్నంటే ఉన్నారని అందులో పప్పూ యాదవ్ చెప్పినట్లుగా ఉంది.

అందువల్ల, వైరల్ న్యూస్ కార్డ్ ఎడిట్ చేశారని, ఒరిజినల్ న్యూస్ కార్డ్ లో పప్పు యాదవ్ జార్ఖండ్‌లోని దళితులు, ఆదివాసీల గురించి ప్రస్తావించారని మేము నిర్ధారించాము.