సీఎం జగన్‌ బర్త్‌ డే స్పెషల్‌.. 'యాత్ర-2' అప్‌డేట్‌ ఇచ్చిన మేకర్స్‌

ఉమ్మడి ఆంధ్రప్రదేశ్‌ దివంగత ముఖ్యమంత్రి వైఎస్‌ రాజశేఖర్‌ రెడ్డి పాదయాత్ర నేపథ్యంలో వచ్చిన 'యాత్ర' సినిమాకు సీక్వెల్‌గా 'యాత్ర-2' సినిమా తెరకెక్కుతోంది. ఇందులో వైఎస్‌ఆర్‌తో పాటు వైఎస్‌ జగన్‌ పాత్ర ఉంది. తాజాగా ఈ సినిమా విడుదల తేదీని మేకర్స్‌ ప్రకటించారు. 'యాత్ర-1' విడుదలైన తేదీ రోజే.. అంటే ఫిబ్రవరి 8వ తేదీన 'యాత్ర-2' విడుదల కానుంది. ఈ సినిమాను మహి వి.రాఘవ తెరకెక్కిస్తున్నారు. ఇవాళ సీఎం జగన్‌ బర్త్‌ డే సందర్భంగా స్పెషల్‌ పోస్టర్‌ను రిలీజ్‌ చేశారు. తాజాగా విడుదలైన పోస్టర్‌లో వైఎస్సార్‌గా మమ్ముట్టి కనిపించగా.. వైఎస్ జగన్‌మోహన్ రెడ్డిగా జీవా కనిపించాడు.

ఈ పోస్టర్‌ను చూసి వైఎస్ అభిమానులు ఫుల్ ఖుషీ అవుతున్నారు. 'యాత్ర 2' సినిమా వైఎస్‌ఆర్‌ చనిపోయిన తర్వాత నుంచి మొదలవుతున్నట్లు తెలుస్తోంది. ఈ సినిమాలో ప్రధానంగా వైఎస్‌ జగన్‌ పాదయాత్రను చూపించబోతున్నట్లు సమాచారం. పాదయాత్రతో మొదలై, సీఎం అయ్యే వరకు ఈ సినిమా స్టోరీ కొనసాగనుందట. అంతేకాదు, జగన్ పాలనలో ప్రజలు ఎలా ఉన్నారు అనేది కూడా టచ్ చేయబోతున్నట్లు టాక్ వినిపిస్తోంది. 'యాత్ర 2' చిత్రాన్ని త్రి ఆటమ్ లీవ్స్, వీ సెల్యూలాయిడ్ సంస్థలు సంయుక్తంగా నిర్మిస్తున్నాయి. సంతోష్‌ నారాయణన్‌ సంగీతం అందిస్తున్నారు.