నాగచైతన్య 'థాంక్యూ' ప్రీ రిలీజ్ డేట్ ఫిక్స్
'ThankYou' Movie Pre Release Event on 16th July. తన నటన, అభినయంతో అక్కినేని నాగచైతన్య ప్రేక్షకుల్లో మంచి గుర్తింపు తెచ్చుకున్నాడు. 'లవ్స్టోరీ', 'బంగార్రాజు'
By - అంజి
తన నటన, అభినయంతో అక్కినేని నాగచైతన్య ప్రేక్షకుల్లో మంచి గుర్తింపు తెచ్చుకున్నాడు. 'లవ్స్టోరీ', 'బంగార్రాజు' హిట్ సినిమాలతో నాగచైతన్య జోరుమీదున్నాడు. ప్రస్తుతం చైతన్య నటించిన లేటెస్ట్ మూవీ 'థాంక్యూ'. ఈ సినిమాతో హ్యట్రిక్ హిట్ కొట్టాలని చూస్తున్నాడు. జులై 22న రిలీజ్ కానున్న 'థాంక్యూ' సినిమాకు విక్రమ్ కే కుమార్ దర్శకత్వం వహించాడు. ఈ సినిమా జులై 8న విడుదల కావాల్సి ఉండగా, పలు కారణాల వల్ల రిలీజ్ డేట్ రెండు వారాలు వాయిదా పడింది. ఈ క్రమంలోనే చిత్రయూనిట్ వరుస అప్డేట్లు ఇస్తూ మూవీపై ఆసక్తిని పెంచుతోంది. తాజాగా మూవీ మేకర్స్ ప్రీ రిలీజ్ తేదీని వెల్లడించారు.
జులై 16న వైజాగ్లోని సర్ సీఆర్ రెడ్డి కన్వెన్షన్ హాల్లో 'థాంక్యూ' ప్రీ రిలీజ్ ఈవెంట్ జరగనుంది. ఈ మేరకు మేకర్స్ తాజాగా పోస్టర్ రిలీజ్ చేశారు. ఈ ఈవెంట్ను శ్రేయాస్ గ్రూప్ నిర్వహిస్తోంది. నాగచైతన్య మెయిన్ రోల్లో నటించిన ఈ మూవీపై ప్రేక్షకులలో మొదటి నుండి మంచి అంచనాలే ఉన్నాయి. లేటెస్ట్గా విడుదలైన ట్రైలర్ సినిమాపై భారీ అంచనాలను క్రియేట్ చేశాయి. రొమాంటిక్ కామెడీ డ్రామాగా ఈ మూవీని తెరకెక్కించారు. ఈ సినిమాలో రాశీఖన్నా, మాళవిక నాయర్, అవికా గోర్ హీరోయిన్లుగా నటించారు. మ్యూజిక్ డైరెక్టర్ థమన్ సంగీతం అందించారు. శ్రీవెంకటేశ్వర క్రియేషన్స్ బ్యానర్పై దిల్రాజు, శిరీష్లు ఈ మూవీని నిర్మించారు.
