ఆర్ఆర్ఆర్ విడుద‌ల తేదీపై కొనసాగుతున్న స‌స్పెన్స్..!

సినీ అభిమానులంతా ఎప్పుడెప్పుడా అని ఎదురుచూస్తున్న చిత్రాల్లో 'ఆర్ఆర్ఆర్(రౌద్రం రణం రుథిరం)' ఒక‌టి. యంగ్ టైగ‌ర్ ఎన్టీఆర్‌, మెగా ప‌వ‌ర్ స్టార్ రామ్‌చ‌ర‌ణ్ ప్ర‌ధాన పాత్ర‌ల్లో న‌టించిన చిత్రం కావ‌డంతో ఈ సినిమాపై అభిమానుల్లో భారీ అంచ‌నాలే ఉన్నాయి. ద‌ర్శ‌క‌దీరుడు రాజ‌మౌళి ఎంతో ప్ర‌తిష్టాత్మ‌కంగా ఈ చిత్రాన్ని తెర‌కెక్కించారు. ఇప్ప‌టికే చిత్రీక‌ర‌ణ మొత్తం పూరైపోయింది. పిరియాడిక్ యాక్షన్ డ్రామాగా రూపుదిద్దుకున్న ఈ చిత్రం ప్ర‌స్తుతం పోస్ట్ ప్రొడ‌క్ష‌న్ కార్య‌క్ర‌మాలు జ‌రుపుకుంటోంది. వాస్త‌వానికి అక్టోబ‌ర్ 13న ఈ చిత్రాన్ని ప్రేక్ష‌కుల ముందుకు తీసుకువ‌స్తున్న‌ట్లు తొలుత మేక‌ర్స్ ప్ర‌క‌టించారు. అయితే.. క‌రోనా కార‌ణంగా కొన్ని రాష్ట్రంలో థియేట‌ర్ల‌పై ఆంక్ష‌లు కొన‌సాగుతున్న నేప‌థ్యంలో చిత్ర విడుద‌ల‌ను వాయిదా వేశారు. ఈ చిత్రం ఎప్పుడు విడుద‌ల అవుతుందా అని అభిమానులు వేయి క‌న్నుల‌తో ఎదురుచూస్తున్నారు.

సంక్రాంతికి ఈ చిత్రాన్ని తీసుకురావాల‌ని మేక‌ర్స్ బావిస్తున్న‌ట్లు వార్త‌లు వినిపిస్తున్నాయి. అయితే.. ఇప్ప‌టికే సంక్రాంతి బ‌రిలో 'రాధే శ్యామ్' వంటి పాన్ ఇండియా సినిమాలు బ‌రిలో ఉండ‌డంతో చిత్ర‌బృందం కాస్త సందిగ్ధంలో ఉన్న‌ట్లు తెలుస్తోంది. వేస‌వి కానుక‌గా ఈ చిత్రాన్ని వ‌చ్చే ఏడాది మార్చి 31న ప్రపంచ వ్యాప్తంగా విడుదల చేయాల‌ని చిత్ర‌బృందం నిర్ణ‌యించిన‌ట్లుగా వార్త‌లు వినిపిస్తున్నాయి. అయితే.. చిత్ర‌బృందం నుంచి ఇప్ప‌టి వ‌ర‌కు ఎలాంటి అధికారిక ప్ర‌క‌ట‌న రాలేదు. అయితే.. నేడు దీనిపై క్లారిటీ రానుంద‌ని అంటున్నారు.