విషాదం.. ప్ర‌ముఖ న‌టి ఉమా దాస్‌గుప్తా క‌న్నుమూత‌

ప్రముఖ సినీ దర్శకుడు సత్యజిత్ రే కల్ట్ మూవీ పథేర్ పాంచాలి నటి ఉమా దాస్‌గుప్తా 84 ఏళ్ల వయసులో ప్రపంచానికి వీడ్కోలు పలికారు. 69 ఏళ్ల క్రితం విడుదలైన ఈ సినిమాలో దుర్గారాయ్ పాత్రలో నటించి రాత్రికి రాత్రే పేరు తెచ్చుకుంది ఉమ. ఆమె మరణవార్త బయటకు రావడంతో ఇండస్ట్రీలో విషాదఛాయలు అలముకున్నాయి.

1955లో పథేర్ పాంచాలి సినిమా థియేటర్లలో విడుదలైంది. సినీ లెజెండ్ సత్యజిత్ రే దర్శకత్వంలో రూపొందిన ఈ చిత్రం కొత్త చ‌రిత్ర‌ను లిఖించింది. ఈ చిత్రంలోని స్టార్ కాస్ట్ గురించి నేటికీ మాట్లాడుకుంటున్నారు. ఈ సినిమాలో ఉమా దాస్‌గుప్తా పోషించిన దుర్గా రాయ్ పాత్ర ఇప్పటికీ సినీ ప్రేమికుల మదిలో ఉంది. ఆమె మరణం కారణంగా ఈ పాత్ర మరోసారి వెలుగులోకి వచ్చింది.

ఉమ మృతికి సంబంధించిన సమాచారాన్ని ఆమె కుటుంబ సభ్యులు తెలిపారు. ఉమా దాస్‌గుప్తా చాలా కాలంగా అనారోగ్యంతో బాధపడుతున్నట్లు తెలుస్తుంది. ఈ క్ర‌మంలోనే ఆమె చికిత్స పొందుతూ కోల్‌కతాలోని ఓ ఆసుపత్రిలో తుది శ్వాస విడిచింది. ఉమ మృతి ఆమె కుటుంబ సభ్యులకు, అభిమానులకు తీవ్ర విషాదాన్ని నింపింది.

ప్రముఖ బెంగాల్ రచయిత బిభూతిభూషణ్ బందోపాధ్యాయ 1929లో రచించిన పథేర్ పాంచాలి నవల ఆధారంగా పథేర్ పాంచాలి చిత్రాన్ని రూపొందించారు. ఉమా దాస్‌గుప్తా నటించిన ఈ చిత్రం జాతీయ చలనచిత్ర అవార్డుతో పాటు అనేక అంతర్జాతీయ చలనచిత్ర అవార్డులను గెలుచుకుంది.

ప్రముఖ చిత్రనిర్మాత సత్యజిత్ రేతో పాటు ఉమా దాస్‌గుప్తా బెంగాలీ చిత్ర పరిశ్రమకు గర్వకారణంగా భావిస్తారు. ఆమె అద్భుతమైన నటనా జీవితంలో.. అనేక చిత్రాలలో పనిచేశారు. ఆమె అంత్యక్రియలకు సంబంధించి ఇంకా ఎలాంటి సమాచారం వెల్లడి కాలేదు.