విశాల్ సినిమాను బాగా దెబ్బ తీసిన రీరిలీజ్ సినిమా

కొన్ని నెలల కింద తెలుగులో రీరిలీజ్ ట్రెండ్ నడిచిన సంగతి తెలిసిందే. ఏదైనా మంచి హిట్ సినిమాను చూడడానికి చాలా మంది థియేటర్లకు క్యూ కట్టారు. అప్పట్లో థియేటర్లలో ఆ సినిమాను చూడలేకపోయామనో.. మరోసారి థియేటర్లలో చూడాలన్న క్రేజ్ రీరిలీజ్ సినిమాలకు ఉండేది. అయితే కొన్ని హిట్ అయ్యాయని వరుసగా రీ రిలీజ్ లను తెలుగులో చేయడంతో మన దగ్గర రీరిలీజ్ ట్రెండ్ కాస్తా తగ్గిపోయింది. అందుకే చాలా రీరిలీజ్ సినిమాలను చూడడానికి మూవీ లవర్స్ ముందుకు రావడం లేదు. అయితే తమిళనాడు బాక్సాఫీసు వద్ద ఓ సినిమా రీ రిలీజ్ దుమ్ము దులిపేస్తూ ఉంది. ఎంతగా అంటే ఈ శుక్రవారం విడుదలైన విశాల్ సినిమా 'రత్నం' కలెక్షన్స్ ను దాటేసే అంతలా!!

‘తలపతి’ విజయ్ ఇరవై ఏళ్ల నాటి స్పోర్ట్స్ యాక్షన్ డ్రామా 'గిల్లీ'ని మళ్లీ విడుదల చేశారు. కల్ట్ క్లాసిక్‌గా పరిగణించిన ఈ సినిమా ఏప్రిల్ 20, 2024న గ్రాండ్ రీ-రిలీజ్ అయింది. అడ్వాన్స్ బుకింగ్‌లలో అద్భుతమైన రికార్డులను సృష్టించడమే కాకుండా ఇది ప్రపంచవ్యాప్తంగా 8 కోట్ల రూపాయల గ్రాస్‌ను సాధించింది, ఇది భారతదేశంలో ఏ రీ-రిలీజ్‌కైనా ఆల్-టైమ్ రికార్డ్. మొదటి రోజు మాత్రమే కాకుండా రెండవ, మూడవ రోజులలో కూడా మంచి పనితీరును కనబరిచింది ఈ సినిమా. మొత్తం 20 కోట్ల గ్రాస్‌ను కూడబెట్టి, మరోసారి రికార్డు సృష్టించింది. ఈ సినిమా తెలుగు బ్లాక్ బస్టర్ 'ఒక్కడు' కు సీక్వెల్. మహేష్ బాబు పాత్రలో విజయ్ నటించాడు. హీరోయిన్ గా త్రిష చేసింది. గిల్లీ రీ రిలీజ్.. విశాల్ కొత్త చిత్రం రత్నం (2024)కి భారీగా మైనస్ అయింది. చాలా ప్రాంతాల్లో రత్నం సినిమా కంటే గిల్లీకే కలెక్షన్స్ ఎక్కువ వస్తున్నాయని విజయ్ అభిమానులు సోషల్ మీడియాలో చెబుతూ ఉన్నారు.