వీరప్పన్‌ను గ్లామరైజ్ చేస్తారా.? పుష్ప క‌థ‌పై 'శక్తిమాన్‌" కామెంట్స్‌

సుకుమార్ దర్శకత్వం వహించిన పుష్ప 2 రూల్ దేశవ్యాప్తంగా సంచలనం సృష్టిస్తోంది. అద్భుతమైన యాక్షన్ సీక్వెన్స్‌లు, కూల్ డైలాగ్స్, అద్భుతమైన నటనతో అల్లు అర్జున్ పుష్పరాజ్‌గా బిగ్ స్క్రీన్‌ల‌లో అభిమానుల‌ను అల‌రిస్తున్నాడు. బ‌న్నీ ఈ సినిమా ద్వారా యాంటీ హీరో ట్రెండ్‌ని ముందుకు తీసుకెళ్లి బాక్సాఫీస్ వద్ద చరిత్ర సృష్టించాడు. ప్రేక్షకులతో పాటు సినీ తారలు కూడా ఈ సినిమా.. అల్లు అర్జున్‌పై క్రేజీ అయిపోయారు. ఇదిలా ఉంటే ఈ సినిమాపై ముఖేష్ ఖన్నా తీవ్ర అసంతృప్తిని వ్యక్తం చేశారు.

శక్తిమాన్ షోతో ప్రసిద్ధి చెందిన ముఖేష్ ఖన్నా.. తన ప్రకటనలతో తరచుగా వార్తల్లో నిలుస్తుంటాడు. కొన్నిసార్లు అతడు పాన్ మసాలా ప్రకటనలు చేసే తారలపై విరుచుకుప‌డుతుంటాడు. కొన్నిసార్లు సినిమాలను నిజాయితీగా సమీక్షిస్తాడు. తాజాగా ఆయన తాజా యాక్షన్ థ్రిల్లర్ పుష్ప 2ని సమీక్షించారు. ఈ సినిమాపై ప్రశంసలతోపాటు విమర్శలు కూడా చేశారు.

ముఖేష్ ఖన్నా యూట్యూబ్ వీడియో ద్వారా పుష్ప 2ని సమీక్షించారు. నిర్మాతలను ప్రశంసిస్తూ.. స్క్రీన్‌పై స్పష్టంగా కనిపించేలా మంచి ప్లాన్‌లతో సినిమాను నిర్మించార‌ని అన్నారు. అమర్ అక్బర్ ఆంటోనీ చిత్రానికి ఉదాహరిస్తూ.. అల్లు అర్జున్ గాలిలో వేలాడిన‌ యాక్షన్ సన్నివేశాన్ని ముఖేష్ ఖన్నా ప్రశంసించారు. పుష్ప 2ని మెచ్చుకున్న ముఖేష్ ఖన్నా.. 10 కి 8-9 మార్కులు ఇచ్చాడు.

కానీ ఆయ‌న‌కు ఒక విషయం అస్సలు నచ్చలేదు. సినిమా కథ విషయంలో ఆయ‌న‌ నిరాశ చెందాడు. సినిమాలో అక్రమ రవాణాను గ్లామరైజ్ చేయడంపై ఆయన అసంతృప్తి వ్యక్తం చేశారు. స్మగ్లింగ్‌ను ఎందుకు కీర్తించాలి, పోలీసులకు వ్యతిరేకంగా ఎందుకు వెళ్లాలి.. దివంగత స్మగ్లర్ వీరప్పన్‌ను గ్లామరైజ్ చేస్తారా అని ముఖేష్ ఖన్నా ప్రశ్నించారు. ఇక్కడ పుష్ప పోలీసులను సవాల్ చేసి, వారిని అవమానించి చివరికి గెలుస్తాడు. మీరు ప్రజలకు ఏమి చెప్పాల‌ని ప్రయత్నిస్తున్నారు? అని ప్ర‌శ్నించారు.

ముఖేష్ ఖన్నాకు పుష్ప 2 కథ నచ్చకపోయినప్పటికీ.. ఆయ‌న‌ అల్లు అర్జున్‌ను చాలా ప్రశంసించాడు. ''నేను అల్లు అర్జున్ మరిన్ని సినిమాలు చూడాలని అనుకుంటున్నాను. అల్లు అర్జున్‌కు శక్తివంతంగా మారగల సత్తా ఉందని కూడా నేను చెప్పాలనుకుంటున్నాను. అతను ఇలా చేస్తున్నాడడు.. మరేదైనా చేస్తున్నాడని నేను చెప్పడం లేదు. ఏదైనా పర్ఫెక్ట్‌గా చేయగల వ్యక్తిత్వం అతనికి ఉందని ప్ర‌శంసించాడు.