బీజేపీ ఎమ్మెల్యేకు వలపు వల.. న్యూడ్‌ వీడియో కాల్‌ చేసి మరీ ముగ్గులోకి..

ఓ యువతి చేసిన అసభ్యకరమైన వీడియో కాల్‌పై కర్ణాటకలోని చిత్రదుర్గ బీజేపీ ఎమ్మెల్యే తిప్పారెడ్డి సైబర్ పోలీసులకు ఫిర్యాదు చేశారు. ఈ విషయాన్ని బుధవారం పోలీసు వర్గాలు తెలిపాయి. సీనియర్ నాయకుడు తిప్పారెడ్డిని హనీ ట్రాప్ చేసేందుకు ఓ ముఠా చేసిన ఫలించని ప్రయత్నం చేసిందని పోలీసు వర్గాలు చెబుతున్నాయి. ఈ ఘటనపై ఎమ్మెల్యే ఫిర్యాదు చేయడంతో ముఠా గుట్టు రట్టయింది.

ఎమ్మెల్యే తిప్పారెడ్డికి అక్టోబర్ 31న గుర్తు తెలియని మహిళ నుంచి ఫోన్ వచ్చింది. మొదట్లో సాధారణ కాల్ వచ్చింది. ఆ తర్వాత వాట్సాప్‌లో వీడియో కాల్ చేసింది. ఆ మహిళ బట్టలు లేకుండా హిందీలో మాట్లాడడం చూసి బీజేపీ నేత తిప్పారెడ్డి షాక్ అయ్యారు. వెంటనే ఎమ్మెల్యే ఫోన్ కట్ చేశారు. ఆ తర్వాత ఆ మొబైల్ నంబర్ నుంచి అతనికి చాలా అసభ్యకర వీడియోలు వచ్చాయి. ఎమ్మెల్యే అన్ని వీడియోలను తొలగించి, నంబర్‌ను బ్లాక్ చేశారని పోలీసు వర్గాలు తెలిపాయి. దీంతో ఎమ్మెల్యే చిత్రదుర్గ సైబర్‌ పోలీసులకు ఫిర్యాదు చేసి బాధ్యులపై చర్యలు తీసుకోవాలని డిమాండ్‌ చేశారు.

అయితే ఈ ఘటనపై పోలీసులు మౌనం దాల్చారు. రాష్ట్రంలో అసెంబ్లీ ఎన్నికలు సమీపిస్తున్న తరుణంలో ఆయనను హనీ ట్రాప్‌లో ఇరికించడం ఆయన రాజకీయ ప్రత్యర్థుల పనే అయి ఉండొచ్చని సంబంధిత వర్గాలు చెబుతున్నాయి.