తిరుపతిలో దారుణం.. వివాహితపై ఇంటి యజమాని అత్యాచారం.. ఫోటోలతో బ్లాక్మెయిల్!
ఆధ్యాత్మిక నగరం తిరుపతిలో ఒక వివాహితపై అత్యాచారయత్నం జరిగిన ఘటన ఆలస్యంగా వెలుగులోకి వచ్చింది.
By - అంజి
తిరుపతిలో దారుణం.. వివాహితపై ఇంటి యజమాని అత్యాచారం.. ఫోటోలతో బ్లాక్మెయిల్!
ఆధ్యాత్మిక నగరం తిరుపతిలో ఒక వివాహితపై అత్యాచారయత్నం జరిగిన ఘటన ఆలస్యంగా వెలుగులోకి వచ్చింది. అలిపిరి పోలీస్ స్టేషన్ పరిధిలోని శ్రీరాంనగర్ అక్కారంపల్లి రోడ్డు ప్రాంతంలో ఈ నెల 2వ తేదీ (గురువారం) తెల్లవారుజామున ఈ దుశ్చర్య జరిగింది. బాధితురాలి భర్త ఉపాధి నిమిత్తం విదేశాల్లో ఉండటంతో, ఆమె తన చిన్న బాబుతో కలిసి ఇంట్లో ఒంటరిగా ఉంటోంది. దీనిని ఆసరాగా చేసుకున్న ఇంటి యజమాని శ్రీనివాసులు రెడ్డి, ఆమెపై అఘాయిత్యానికి ఒడిగట్టాడు.
నిందితుడు మహిళపై వికృత చేష్టలకు పాల్పడటమే కాకుండా, తన ఫోన్లో ఆమెకు సంబంధించిన ఫోటోలు తీసి తీవ్రంగా భయపెట్టాడు. ఆ ఫోటోలను బయటపెడతానని బ్లాక్మెయిల్ చేస్తూ ఆమెను మానసిక వేదనకు గురిచేశాడు. ఈ ఘటనతో తీవ్ర దిగ్భ్రాంతికి, భయాందోళనకు లోనైన బాధితురాలు వెంటనే తన పుట్టింటికి వెళ్లిపోయింది. అక్కడ తన బంధువులకు జరిగిన విషయాన్ని వివరించి, వారి సహాయంతో పోలీసులను ఆశ్రయించింది.
బాధితురాలి ఫిర్యాదు మేరకు అలిపిరి పోలీసులు నిందితుడు శ్రీనివాసులు రెడ్డిపై అత్యాచారం, బ్లాక్మెయిలింగ్ కింద కేసు నమోదు చేశారు. నిందితుడి కోసం గాలింపు చర్యలు చేపట్టారు. రక్షణగా ఉండాల్సిన ఇంటి యజమానే ఇలాంటి వికృత చేష్టలకు పాల్పడటం స్థానికంగా తీవ్ర కలకలం రేపింది. ఒంటరిగా ఉండే మహిళల భద్రతపై ఈ ఘటన పలు ప్రశ్నలను లేవనెత్తింది.
