హిజాబ్‌ తొలగించాలని విద్యార్థినిలపై ఒత్తిడి.. ప్రిన్సిపాల్‌తో సహా ముగ్గురిపై కేసు ఫైల్

హైదరాబాద్‌: హయత్‌నగర్‌లోని ఓ ప్రైవేట్‌ పాఠశాలలో ఇద్దరు విద్యార్థులను హిజాబ్‌ తొలగించాలని అన్నందుకు ప్రిన్సిపాల్‌, ముగ్గురు ఉపాధ్యాయులపై కేసు నమోదైంది. హిజాబ్ ధరించడంపై అభ్యంతరం వచ్చిందని 10వ తరగతి విద్యార్థి చేసిన ఫిర్యాదు మేరకు జూన్ 23న కేసు నమోదు చేశారు. తరగతి గదిలో హిజాబ్‌ ధరించవద్దని బాలికకు సూచించారు.

పోలీసులు తెలిపిన వివరాల ప్రకారం.. జూన్ 22న హయత్‌నగర్‌లోని ఓ ప్రైవేట్ స్కూల్‌లో చదువుతున్న 10వ తరగతి విద్యార్థిని, ఆమె స్నేహితురాలు తమ మత విశ్వాసాల కారణంగా హిజాబ్ ధరించారు. ఉదయం సమయంలో సాంఘిక శాస్త్రం టీచర్‌ వారిని ప్రశ్నించారు. హిజాబ్ ధరించేందుకు ప్రిన్సిపాల్ నుంచి అనుమతి తీసుకున్నారా అని ఆమె ప్రశ్నించారు.

విద్యార్థులు ఎలాంటి అనుమతి తీసుకోలేదని చెప్పడంతో, సోషల్ టీచర్ హిజాబ్‌ను తొలగించమని చెప్పారు. విద్యార్థులు తమ హక్కు అని, తాము నమ్మేదాన్ని ఎంచుకుంటామని చెప్పగా, టీచర్‌ తమ పాఠశాలలో హిజాబ్ ధరించకూడదని నియమం ఉంది అని బదులిచ్చారు. కొన్ని గంటల తర్వాత ప్రిన్సిపాల్ విద్యార్థులను పిలిచి ఇది నిబంధనలకు విరుద్ధమని చెప్పారు. మతాన్ని స్కూల్ బయట వదిలేయాలని, లోపలికి తీసుకురావద్దని చెప్పింది.

ప్రిన్సిపాల్ ప్రకారం.. తమ పాఠశాలలోని ముస్లిం ఉపాధ్యాయులు కూడా పాఠశాలలోకి ప్రవేశించినప్పుడు బుర్ఖాను తీసివేసి వస్తారు. విద్యార్థులు కూడా అదే నియమాన్ని పాటించాలని కోరారు. ఫిర్యాదుదారు ప్రకారం.. ప్రిన్సిపల్ హిజాబ్‌ ధరించినందుకు తమను తరగతి గదిలోకి వెళ్లేందుకు అనుమతించలేదు. పాఠశాలకు చెందిన మరో కోఆర్డినేటర్ విద్యార్థులను గదిలోకి తీసుకెళ్లి హిజాబ్‌ను తొలగించాలని ఒత్తిడి చేశాడు.

సెక్షన్ 298 (ఉచ్చారణ, పదాలు మొదలైనవి, ఉద్దేశపూర్వకంగా ఏ వ్యక్తి యొక్క మతపరమైన భావాలను దెబ్బతీసే ఉద్దేశ్యంతో), జువైనల్ జస్టిస్ (JJ) చట్టంతో సహా IPCలోని వివిధ సెక్షన్ల కింద కేసు నమోదు చేయబడింది.