దారుణం.. 11 ఏళ్ల బాలికపై వలస కార్మికుడు అత్యాచారం.. ఎవరికి చెప్పొదని రూ.150 ఇచ్చి..

బెంగళూరు నగరంలో 11 ఏళ్ల మైనర్ బాలికపై లైంగిక దాడికి పాల్పడిన ఘటనలో 28 ఏళ్ల మహమ్మద్ మున్నా అనే వ్యక్తిని పోలీసులు అరెస్ట్ చేశారు. బీహార్‌కు చెందిన నిందితుడు నగరంలో నిర్మాణ రంగ కార్మికుడిగా పనిచేస్తున్నాడు. బుధవారం సాయంత్రం బాలిక తన ఇంటి బయట ఆడుకుంటుండగా, నిందితుడు ఆమెను సమీపంలోని ఒక నిర్మాణంలో ఉన్న భవనంలోకి తీసుకెళ్లి ఈ అఘాయిత్యానికి ఒడిగట్టాడు.

ఈ విషయాన్ని ఎవరికీ చెప్పవద్దని బెదిరిస్తూ, బాలికకు రూ.150 నగదు ఇచ్చి నిందితుడు అక్కడి నుండి పంపించివేశాడు. చాలా సేపటి వరకు బాలిక కనిపించకపోవడంతో ఆందోళన చెందిన తల్లిదండ్రులు, ఆమె తిరిగి రాగానే తన వద్ద ఉన్న నగదును చూసి నిలదీశారు. తీవ్ర భయాందోళనకు గురైన ఆ బాలిక, తనపై జరిగిన దారుణాన్ని తల్లిదండ్రులకు వివరించింది. దీంతో బాధితురాలి కుటుంబ సభ్యులు వెంటనే జ్ఞానభారతి పోలీస్ స్టేషన్‌ను ఆశ్రయించారు.

పోలీసులు ఈ ఘటనపై పోక్సో (POCSO) చట్టంతో పాటు భారతీయ న్యాయ సంహిత (BNS) కింద కేసు నమోదు చేసి, నిందితుడిని తక్షణమే అదుపులోకి తీసుకున్నారు. ప్రస్తుతం బాధితురాలికి వైద్య పరీక్షలు నిర్వహించి, మానసిక నిపుణుల ద్వారా కౌన్సిలింగ్ ఇప్పిస్తున్నారు. నిందితుడి నేపథ్యంపై మరియు గతంలో ఇలాంటి నేరాలకు పాల్పడ్డాడా అనే కోణంలో పోలీసులు లోతుగా దర్యాప్తు చేస్తున్నారు.