Hyderabad: వైద్య విద్యార్థి ఆత్మహత్య.. క్లాస్‌మేట్స్‌తో గొడవపై పోలీసుల దర్యాప్తు

హైదరాబాద్: జవహర్ నగర్‌లో బుధవారం 21 ఏళ్ల వైద్య విద్యార్థి ఆత్మహత్యకు పాల్పడ్డాడు. బాధితుడిని నారాయణపేట జిల్లా విఠలాపూర్ గ్రామానికి చెందిన జీడి జగదీష్‌గా గుర్తించారు. జగదీష్ ఎర్రగడ్డ BRKR ప్రభుత్వ ఆయుర్వేద కళాశాలలో BAMS చదువుతున్నాడు. అతను తన స్నేహితుడు, తోటి వైద్య విద్యార్థి ఫణేంద్రతో కలిసి జవహర్ నగర్‌లో ఓ అద్దె గదిలో ఉంటున్నారు. మధురానగర్ పోలీసులు తెలిపిన వివరాల ప్రకారం.. విఠలాపూర్ గ్రామానికి చెందిన జగదీష్ తండ్రి జె.మాణిక్యప్ప వ్యవసాయం చేస్తూ జీవనం సాగిస్తున్నాడు. జగదీష్ పెద్ద కొడుకు కావడంతో ఎప్పటి నుంచో డాక్టర్ కావాలనే కోరిక ఉండేది.

గతేడాది ఎంబీబీఎస్‌లో సీటు రాకపోవడంతో నీట్‌ ప్రవేశ పరీక్షకు హాజరైన తర్వాత ఎర్రగడ్డ ఆయుర్వేద కళాశాలలో బ్యాచిలర్‌ ఆఫ్‌ ఆయుర్వేద మెడిసిన్‌ అండ్‌ సర్జరీ (బీఏఎంఎస్‌)లో చేరాడు. ఈ సంఘటన బుధవారం తెల్లవారుజామున జరిగింది. జగదీష్ తన స్నేహితుడు అజయ్‌కు వాట్సాప్ మెసేజ్‌ చేసి సూసైడ్‌ చేసుకుంటున్న విషయాన్ని చెప్పాడు. అజయ్ వెంటనే తమ స్నేహితుడైన నవీన్‌ను అప్రమత్తం చేశాడు. సమయం వృధా చేయకుండా నవీన్, ఫణీంద్ర, ప్రశాంత్‌లతో కలిసి జవహర్ నగర్‌కు చేరుకున్నారు. జగదీష్‌ను ఈఎస్‌ఐ ఆస్పత్రికి తరలించగా అప్పటికే మృతి చెందినట్లు వైద్యులు నిర్ధారించారు.

మధురా నగర్ పోలీస్ స్టేషన్‌లో సెక్షన్ 174 కింద కేసు నమోదు చేశారు.ఆత్మహత్యకు దారితీసిన పరిస్థితులను తెలుసుకునేందుకు పోలీసులు దర్యాప్తు ప్రారంభించారు. జగదీష్ తండ్రి మాణిక్యప్ప అధికారికంగా పోలీసులకు ఫిర్యాదు చేశారు. బుధవారం రాత్రి జగదీష్, ఫణీంద్ర, సహవిద్యార్థి మధ్య తీవ్ర వాగ్వాదం జరిగినట్లు వెల్లడించారు. జగదీష్ ఆత్మహత్య చేసుకోవాలనే నిర్ణయంలో వాగ్వాదం, తదనంతర బాధలు పాత్ర పోషించాయో లేదో తెలుసుకోవడానికి అధికారులు ప్రస్తుతం కసరత్తు చేస్తున్నారు.

BAMS మొదటి సంవత్సరం పరీక్షలు జూలై 25 నుండి ప్రారంభం కానున్నాయని జగదీష్ క్లాస్‌మేట్ చెప్పాడు. దురదృష్టవశాత్తు, జగదీష్ కళాశాలకు క్రమం తప్పకుండా హాజరు కాలేకపోయాడు. పరీక్షలకు అవసరమైన హాల్ టికెట్ పొందడంలో ఇబ్బందులు ఎదుర్కొంటున్నాడు. దీంతో అతడు తీవ్ర ఒత్తిడికి లోనయ్యారు. తనకు హాల్ టికెట్ ఇవ్వకపోవచ్చని, ఫలితంగా పరీక్షలు రాయలేకపోతానేమోనని భయపడ్డాడు.