మహిళా దినోత్సవం వేళ కామారెడ్డిలో ఘోరం.. ముగ్గురు కుమార్తెలను చెరువులో తోసి చంపిన తండ్రి

అంతర్జాతీయ మహిళా దినోత్సవం వేళ కామారెడ్డి జిల్లాలో గుండెలవిసే విషాదం చోటుచేసుకుంది. అల్లారుముద్దుగా పెంచుకోవాల్సిన కన్నతండ్రే కాలయముడిగా మారి, తన ముగ్గురు కుమార్తెలను చెరువులో తోసి కిరాతకంగా చంపేశాడు. ఈ మనసు కలిచివేసే ఘటనకు సంబంధించిన పూర్తి వివరాలు ఇక్కడ ఉన్నాయి. కామారెడ్డి పట్టణం ఆర్బీ నగర్‌కు చెందిన ఇస్మాయిల్ ఆటో డ్రైవర్‌గా పనిచేస్తున్నాడు. ఇతడికి షీపత్ (8), ఆయత్ (7), మరియం (5) అనే ముగ్గురు కుమార్తెలు ఉన్నారు.

శనివారం మధ్యాహ్నం భార్య షబీనా పనికి వెళ్లి వచ్చేసరికి పిల్లలు కనిపించకపోవడంతో ఆందోళన చెంది పోలీసులకు ఫిర్యాదు చేసింది. పోలీసులు రంగంలోకి దిగి విచారించగా, తండ్రి ఇస్మాయిల్ పొంతన లేని సమాధానాలు చెప్పాడు. హోటల్‌కు తీసుకెళ్లి వదిలేశానని నమ్మించే ప్రయత్నం చేశాడు. అయితే సిసిటీవీ ఫుటేజీలను పరిశీలించిన పోలీసులు, అతడిని గట్టిగా ప్రశ్నించడంతో అసలు నిజం ఒప్పుకున్నాడు. అప్పుల బాధ తాళలేక, పిల్లలను పోషించలేననే సాకుతో ముగ్గురు ఆడపిల్లలను తానే స్వయంగా పెద్దచెరువులోకి తోసేసినట్లు అంగీకరించాడు.

నిందితుడు చెప్పిన వివరాల ప్రకారం.. ముందుగా రెండో కుమార్తెను, ఆ తర్వాత మూడో కుమార్తెను, చివరగా పెద్ద కుమార్తెను ఒకరి తర్వాత ఒకరిని నీటిలోకి నెట్టేశాడు. పిల్లలు చనిపోయారని నిర్ధారించుకోవడానికి అరగంట పాటు చెరువు గట్టునే వేచి ఉన్నాడు. తనకున్న రూ. 5 లక్షల అప్పులే ఈ ఘాతుకానికి కారణమని, తాను కూడా ఆత్మహత్య చేసుకోవాలనుకున్నానని ఇస్మాయిల్ తెలిపాడు. శనివారం రాత్రికి ఇద్దరు కుమార్తెల మృతదేహాలను పోలీసులు వెలికితీశారు, పెద్ద కుమార్తె కోసం గాలింపు కొనసాగుతోంది.