హైదరాబాద్‌లో సినీ ఫక్కీలో వ్యాపారవేత్త కిడ్నాప్‌ కలకలం

హైదరాబాద్‌లో ఓ వ్యాపారవేత్త కిడ్నాప్‌ కలకలం రేపింది. నార్సింగి పోలీస్‌ స్టేషన్‌ పరిధిలో ఈ కిడ్నాప్‌ సంఘటన చోటుచేసుకుంది. కొందరు గుర్తు తెలియని వ్యక్తులు వ్యాపరవేత్తను కారులో బలవంతంగా ఎక్కించుకుని కిడ్నాప్ చేశారు.

నార్సింగి పోలీస్‌ స్టేషన్ పరిధిలో వ్యాపారవేత్త శశివర్దన్‌ రెడ్డిని దుండగులు కిడ్నాప్ చేసినట్లు తెలిసింది. అయితే.. ఈ కిడ్నాప్‌ గురించి స్థానికంగా ఉన్న కుటుంబ సభ్యులు తెలుసుకున్నారు. ఆ వెంటనే పోలీసులకు సమాచారం ఇచ్చారు. వారు కూడా ఏమాత్రం ఆలస్యం చేయకుండా రంగంలోకి దిగారు. కమాండ్‌ కంట్రోల్ రూమ్‌తో వెహికిల్‌ను గుర్తించారు. ఆ తర్వాత ఆ వాహనం వెళ్లిన రూట్‌ను కనిపెట్టారు. మహబూబ్‌నగర్‌ వైపుగా వెళ్తున్నట్లు తెలిసింది. దాంతో.. అక్కడి పోలీసులకు చెప్పడంతో అలర్ట్‌ అయ్యి కారును ఆపేసి.. బాధితుడిని కాపాడారు. కాగా..శశివర్దన్‌ రెడ్డిని కిడ్నాపర్లు హైదరాబాద్‌ నుంచి కర్నూలు తీసుకెళ్తున్నట్లు పోలీసులు చెబుతున్నారు. ఆర్థిక లావాదేవీలే ఈ కిడ్నాప్‌కు కారణమని అనుమానం వ్యక్తం చేశారు. ఇక శశివర్ధన్ రెడ్డి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. శశివర్ధన్‌రెడ్డి క్షేమంగా ఇంటికి చేరడంతో కుటుంబ సభ్యులు ఊపిరి పీల్చుకున్నారు. వెంటనే స్పందించి వేగంగా కిడ్నాప్‌ను చేధించినందుకు ధన్యవాదాలు తెలిపారు.