అమెరికాలో భారీగా పెరిగిన తెలుగు జనాభా.. ఎక్కువ మంది మాట్లాడే భాష కూడా మనదే

యూఎస్‌ఏలో తెలుగు మాట్లాడే జనాభా గత ఎనిమిదేళ్లలో నాలుగు రెట్లు పెరిగింది. 2016లో 3,20,000 నుండి 2024లో 1.23 మిలియన్లకు పెరిగింది. ఈ పెరుగుదల యూఎస్‌లో అత్యధికంగా మాట్లాడే విదేశీ భాషల్లో తెలుగు 11వ స్థానంలోనూ, అత్యధికంగా మాట్లాడే భారతీయ భాషల్లో మూడో స్థానంలోనూ ఉంది. మొదట హిందీ, గుజరాతీ తర్వాతి స్థానాల్లో ఉన్నాయి. యూఎస్‌ సెన్సస్ బ్యూరో డేటా ఆధారంగా.. యూఎస్‌ యొక్క స్టాటిస్టికల్ అట్లాస్ నుండి వచ్చిన నివేదిక ప్రకారం.. ఈ పెరుగుదలలో నాల్గవ తరం వలసదారులు, ఇటీవలి విద్యార్థులు కూడా ఉన్నారు అని టైమ్స్ ఆఫ్ ఇండియా రిపోర్ట్‌ చేసింది. దాదాపు 2,00,000 మంది నివాసితులతో కాలిఫోర్నియా అత్యధిక తెలుగు మాట్లాడే జనాభాను కలిగి ఉంది.

1,50,000 మందితో టెక్సాస్, 1,10,000 మందితో న్యూజెర్సీ తరువాతి స్థానాల్లో ఉన్నాయి. ఇల్లినాయిస్, వర్జీనియా, జార్జియా వంటి రాష్ట్రాలు కూడా గణనీయమైన తెలుగు కమ్యూనిటీలను కలిగి ఉన్నాయి. వరుసగా 83,000, 78,000, 52,000 మంది తెలుగు మాట్లాడే వారు ఉన్నారు. 2010 నుండి 2017 మధ్య కాలంలో యూఎస్‌ నివాసితులలో తెలుగు మాట్లాడే వారి సంఖ్య 86% పెరిగిందని 2017లో అధ్యయనం చేసిన అమెరికన్ థింక్ ట్యాంక్ సెంటర్ ఫర్ ఇమ్మిగ్రేషన్ వెల్లడించింది . 2018లో అధ్యయనాన్ని విడుదల చేసిన సెంటర్ ఫర్ ఇమ్మిగ్రేషన్, అమెరికాలో అత్యంత వేగంగా అభివృద్ధి చెందుతున్న భాష తెలుగు అని వెల్లడించింది.

2017లో అమెరికాలో తెలుగు మాట్లాడేవారి సంఖ్య 4,00,000 మందికి పైగా ఉన్నదంటే అమెరికాలో తెలుగు మాట్లాడే వారి సంఖ్య ఎంతగా పెరిగిందో అర్థం చేసుకోవచ్చు. ఇది 2010తో పోలిస్తే దాదాపు రెట్టింపు సంఖ్య. ప్రతి సంవత్సరం, తెలుగు మాట్లాడే ప్రాంతాల నుండి 60,000 నుండి 70,000 మంది విద్యార్థులు, దాదాపు 10,000 మంది H-1B వీసా హోల్డర్లు యూఎస్‌కు వెళ్తున్నారు. ఉత్తర అమెరికా తెలుగు అసోసియేషన్ మాజీ సెక్రటరీ అశోక్ కొల్లా మాట్లాడుతూ.. ఈ కొత్తవారిలో 80 శాతం మంది తమ సంస్థలో నమోదు చేసుకున్నారని, దాదాపు 75 శాతం మంది డల్లాస్, బే ఏరియా, నార్త్ కరోలినా, న్యూజెర్సీ, అట్లాంటా, ఫ్లోరిడా, నాష్విల్లే వంటి నగరాల్లో స్థిరపడ్డారు. ఇండియన్ మొబిలిటీ రిపోర్ట్ 2024 ప్రకారం, యుఎస్‌లోని భారతీయ విద్యార్థుల జనాభాలో తెలంగాణ మరియు ఆంధ్రప్రదేశ్‌ల విద్యార్థులు 12.5% ​​ఉన్నారు.