విజయవాడలో దారుణం.. చిన్నారి ప్రైవేట్ భాగాలపై వాతలు పెట్టిన టీచర్!

విజయవాడ విద్యాధరపురంలోని ఒక డే-కేర్ సెంటర్‌లో నాలుగేళ్ల చిన్నారిపై జరిగిన అమానుష ఘటన కలకలం రేపుతోంది. చిన్నారి ప్రైవేట్ భాగాల్లో కాలిన గాయాలు కావడంతో ప్రస్తుతం ఆమె ఒక ప్రైవేట్ ఆసుపత్రిలో మృత్యువుతో పోరాడుతోంది. ఈ ఘటనపై భవానిపురం పోలీసులు శుక్రవారం (మార్చి 6, 2026) సదరు డే-కేర్ సెంటర్ సిబ్బందిపై కేసు నమోదు చేశారు. చిన్నారి తల్లి ఫిర్యాదు ప్రకారం.. ఫిబ్రవరి 23న ఉదయం పాపను డే-కేర్ సెంటర్‌లో విడిచిపెట్టారు. అయితే, అదే రోజు ఉదయం 11:45 గంటల ప్రాంతంలో కేర్ టేకర్ ఫోన్ చేసి, పాపకు వేరే డ్రెస్ తీసుకురావాలని కోరారు.

తల్లిదండ్రులు అక్కడికి చేరుకునేసరికి చిన్నారి బట్టలు లేకుండా ఉందని, ఆమె గడ్డం కింద, ప్రైవేట్ భాగాలపై తీవ్రమైన కాలిన గాయాలు ఉన్నాయని గుర్తించారు. ఈ దారుణంపై చిన్నారిని ఆరా తీయగా, ఒక టీచర్ తనను కాల్చినట్లు ఆమె తల్లిదండ్రులకు వివరించింది. శుక్రవారం మీడియాలో మాట్లాడిన బాధితురాలి తల్లిదండ్రులు, తమ బిడ్డ పరిస్థితి అత్యంత విషమంగా ఉందని ఆవేదన వ్యక్తం చేశారు. పసిపాపపై ఇంతటి క్రూరత్వానికి ఒడిగట్టిన వారిని గుర్తించి, కఠినంగా శిక్షించాలని వారు అధికారులను డిమాండ్ చేశారు. పోలీసులు ఈ ఘటనను తీవ్రంగా పరిగణించి, డే-కేర్ సిబ్బందిని విచారిస్తున్నారు.