Cyclone Ditwah : రేపు స్కూళ్లకు సెలవు

బంగాళాఖాతంలో ఏర్పడిన 'దిత్వా' తుపాను ప్రభావంతో ఆంధ్రప్రదేశ్‌లోని పలు ప్రాంతాల్లో వర్షాలు కురుస్తున్నాయి. భారీ వర్షాలు, బలమైన గాలులు వీచే అవకాశం ఉందన్న వాతావరణ శాఖ హెచ్చరికల నేపథ్యంలో, నెల్లూరు, అన్నమయ్య జిల్లాల్లోని అన్ని విద్యాసంస్థలకు డిసెంబర్ 1 తేదీ సెలవు ప్రకటిస్తూ అధికారులు ఉత్తర్వులు జారీ చేశారు.

నెల్లూరు జిల్లా కలెక్టర్ మొగిలి వెంకటేశ్వర్లు సెలవుపై ఓ ప్రకటన విడుదల చేశారు. తుపాను కారణంగా జిల్లావ్యాప్తంగా భారీ వర్షాలు కురిసే అవకాశం ఉన్నందున ప్రభుత్వ, ప్రైవేట్, ఎయిడెడ్ పాఠశాలలతో పాటు అంగన్‌వాడీ కేంద్రాలు, జూనియర్ కళాశాలలకు సెలవు ఇస్తున్నట్లు తెలిపారు. అన్నమయ్య జిల్లాలోనూ విద్యాశాఖ అధికారులు పాఠశాలలకు సెలవు ప్రకటించారు. భారీ వర్షాల నేపథ్యంలో విద్యార్థులు ఇళ్ల వద్దే సురక్షితంగా ఉండాలని సూచించారు. విశాఖ వాతావరణ కేంద్రం అంచనాల ప్రకారం, దిత్వా తుపాను ప్రభావంతో రాయలసీమలో 10 నుంచి 15 సెంటీమీటర్ల వర్షపాతం నమోదయ్యే అవకాశం ఉంది. గంటకు 60 నుంచి 80 కిలోమీటర్ల వేగంతో బలమైన గాలులు వీస్తాయని హెచ్చరించింది.