అనంతపురంలో కలకలం.. మూడేళ్లుగా ఇంట్లోనే అక్కాచెల్లెళ్లు, సోదరుడు.. చివరకు ఎలా అయిపోయారంటే

తల్లిదండ్రులు దూరమయ్యారనే కుంగుబాటుతో ఒక కుటుంబానికి చెందిన ముగ్గురు.. రాత్రీపగలు ఇంటికే పరిమితమయ్యారు. మూడేళ్ల పాటు చీకటిలోనే బతుకులు సాగిస్తున్న.. ఈ విషాద ఘటన అనంతపురం వేణుగోపాల్‌నగర్‌లో వెలుగుచూసింది. చిందరవందరగా ఉన్న ఓ గదిలోకి పోలీసులు ప్రవేశించినప్పుడు.. చీకటి మూలలో ముగ్గురు తోబుట్టువులు భయంతో తలో పక్క పరిగెత్తారు. అయితే పోలీసులతో పాటు ఉన్న ఒక మానసిక వైద్యుడు వారి భద్రత గురించి ముగ్గురికి భరోసా ఇవ్వడానికి తీవ్రంగా ప్రయత్నించాడు.

గంటల తరబడి కౌన్సెలింగ్‌ తర్వాత చివరకు ముగ్గురు బయటకు వచ్చారు. మూడేళ్ల తర్వాత ఆ ముగ్గురూ బయటి ప్రపంచాన్ని చూశారు. రెండేళ్ల తర్వాత తొలిసారి సూర్యకాంతి కనిపించడంతో కళ్లు తుడుచుకున్నారు. తిరుపాల్ శెట్టి, జయలక్ష్మి, కృష్ణ వేణి 2016లో తమ తండ్రిని కోల్పోయారు. ఒక సంవత్సరం తర్వాత వారి తల్లి క్యాన్సర్‌తో మరణించింది. వాళ్ల నాన్న రామయ్య శెట్టి తినుబండారం నడుపుతూ ఇరుగుపొరుగున మంచి గౌరవం పొందేవారు.

కోవిడ్ -19 ముగ్గురి పరిస్థితిని మరింత దిగజార్చింది. లాక్‌డౌన్‌ కారణంగా ఇంటి నుంచి బయటకు రాకుండా, ఎవరితోనూ మాట్లాడకుండా తాళం వేసుకున్నారు. తిరుపాల్ శెట్టి మాత్రమే అప్పుడప్పుడు ఆహార పొట్లాలు, నీళ్ళు కొనుక్కోవడానికి బయటకు వచ్చేవాడు. కొన్ని నెలలుగా బిల్లులు చెల్లించకపోవడంతో వారి విద్యుత్ కనెక్షన్ కూడా నిలిచిపోయింది.

దుర్వాసన

వారి ఇంటి నుంచి దుర్వాసన రావడంతో ఇరుగుపొరుగు వారు సూపరింటెండెంట్ ఆఫ్ పోలీస్ (ఎస్పీ) ఫకీరప్పను అప్రమత్తం చేశారు. మునిసిపల్ అడ్మినిస్ట్రేషన్‌తో పాటు అతని పోలీసు బృందం సంఘటనా స్థలానికి చేరుకుంది. లోపల చాలా అపరిశుభ్రమైన స్థితిలో ఉన్న ముగ్గురిని గుర్తించారు.

సాలెపురుగుల వలలు, ఎలుకలు, భారీగా ఖాళీ ఫుడ్ ప్యాకెట్లు పక్కన పడేసినట్లు అధికారులు గుర్తించారు. ఈ ముగ్గురూ నెలల తరబడి చిందరవందరగా ఉన్న జుట్టుతో, పెరిగిన గోళ్లతో అధ్వాన్నంగా ఉన్నారు. నెలల తరబడి స్నానం కూడా చేయలేదు. అధికారులు బలవంతంగా ఇంట్లోకి ప్రవేశించి మున్సిపల్ పారిశుధ్య సిబ్బంది సహాయం తీసుకోవాల్సి వచ్చింది. అనంతరం పోలీసులు ముగ్గురికి కౌన్సెలింగ్‌ ఇచ్చేందుకు ప్రభుత్వ జనరల్‌ ఆసుపత్రిలోని సైకియాట్రీ విభాగంలో అసిస్టెంట్‌ ప్రొఫెసర్‌ బి. వరదరాజును ఆశ్రయించారు. చివరకు వారిని బయటకు రమ్మని ఒప్పించాడు. అనంతరం వారిని చికిత్స నిమిత్తం ఆస్పత్రికి తరలించారు

"మేము బాగానే ఉన్నాము. మా తల్లిదండ్రుల మరణం తరువాత మేము నిరాశకు గురయ్యాము. బయటికి రాలేదు. మేము సమీపంలోని హోటల్ నుండి ఆహారం పొందాము. మనుగడ కోసం మా బ్యాంకు ఖాతాలో తగినంత మొత్తం ఉంది. నేను విత్ డ్రా చేసేవాడిని" అని తోబుట్టువులలో ఒకరైన తిరుపాల్ శెట్టి అన్నారు. తోబుట్టువులను బయటకు తీసుకువచ్చినప్పటికీ, వారు ఇప్పటికీ ప్రజలతో మమేకమయ్యేందుకు సిద్ధంగా లేరని చెప్పారు.