నిర్మల్‌ జిల్లా వ్యాప్తంగా ఇంటర్నెట్‌ సేవలు నిలిపివేత

నిర్మల్ జిల్లా వ్యాప్తంగా ఇంటర్నెట్‌ సేవలు నిలిపివేశారు. నిర్మల్ జిల్లాలోని భైంసా పట్టణంలో ఆదివారం అర్థరాత్రి రెండు వర్గాల మధ్య తీవ్ర ఘర్షణ చోటు చేసుకుంది. ఈ ఘర్షణ వల్ల తీవ్ర ఉద్రిక్తత పరిస్థితులు నెలకొన్నాయి.  కోర్వాగల్లిలో ఒక వర్గానికి చెందిన వ్యక్తి బైక్‌పై వెళ్తుండగా మరో వర్గానికి చెందిన వ్యక్తి వాగ్వాదానికి దిగాడు. ఈ గొడవ చిలికి చిలికి గాలివానలా మారింది. ఇరు వర్గాల మధ్య ఘర్షణకు దారి తీసింది. ఈ ఘర్షణలో రెండు వర్గాలు ఒకరిపై మరోకరు రాళ్లు రువ్వుకున్నారు. మూడు మోటర్‌ సైకిళ్ల, రెండు ఇళ్లను గుర్తు తెలియని దుండుగుల దగ్ధం చేశారు. సమాచారం అందుకున్న పోలీసులు ఘటనస్థలానికి చేరుకుని వివరాలు తెలుసుకున్నారు.

పోలీసులకు గాయాలు

ఈ హింసాకాండలో జిల్లా పోలీస్‌ సూపరింటెండెంట్‌ శశిధర్‌ రాజు, భైంసా సీఐ వేణుగోపాల్‌ రావు, ముథోల్‌ ఎస్సై అశోక్‌, కానిస్టేబుళ్లు గాయపడ్డారు. మరికొందరికి కూడా ఈ ఘర్షణలో గాయాలు అయ్యాయి. క్షతగాత్రులకు ప్రస్తుతం స్థానిక ఆస్పత్రిలో చికిత్స పోందుతున్నారు. ఈ ఘటన నేపథ్యంలో దేశ వ్యాప్తంగా అల్లర్లు చోటు చేసుకునే అవకాశం ఉన్నందున ముందస్తుగా జిల్లా వ్యాప్తంగా ఇంటర్నెట్‌ సేవలను నిలిపివేశారు అధికారులు. నిందితుల కోసం సీసీ కెమెరాలను పరిశీలిస్తున్నారు.

144 సెక్షన్‌ అమలు

ఈ సందర్భంగా బైంసాలో పోలీసులు భారీ ఎత్తున మోహరించారు. బైంసా మతపరంగా సున్నితమైన పట్టణం. బైంసాలో 2008లో రెండు వర్గాల మధ్య పెద్ద ఎత్తున ఘర్షణలు చోటు చేసుకున్నాయి. ఈ ఘర్షణ నేపథ్యంలో బైంసాలో 144 సెక్షన్‌ అమలులో ఉంది. ప్రస్తుతం ప్రశాంత వాతావరణం ఉన్నట్లు తెలుస్తోంది. ఎవరైన శాంతి భద్రతలకు విఘాత కలిగిస్తే కఠిన చర్యలు తప్పవని పోలీసులు హెచ్చరించారు.

సుభాష్ గౌడ్

నేను న్యూస్ మీటర్‌లో జర్నలిస్టుగా పని చేస్తున్నాను. గతంలో రిపోర్టర్‌గా, కంటెంట్ రైటర్‌, సబ్ ఎడిటర్‌గా భారత్‌ టుడే న్యూస్‌ ఛానల్‌, సూర్య, ఆంధ్రప్రభ, న్యూస్‌హబ్‌, ఏపీ హెరాల్డ్‌లలో పని చేశాను. జర్నలిజం పట్ల ఇష్టంతో నేను ఈ మార్గాన్ని ఎంచుకున్నాను.