రామ్‌చరణ్‌ కూతురికి ముకేశ్‌ అంబాని స్పెషల్‌ గిఫ్ట్‌

మెగా పవర్‌ స్టార్‌ టాలీవుడ్‌ ద్వారా పరిచయమై.. తన రేంజ్‌ను పెంచుకుంటూ పాన్‌ ఇండియా స్టార్‌గా ఎదిగిపోయాడు. అంతేకాదు.. గ్లోబల్‌ స్టార్‌ అని కూడా పిలుస్తుంటారు ఆయన అభిమానులు. జూన్‌ 20న రామ్‌చరణ్‌-ఉపాసన దంపతులకు పండంటి ఆడబిడ్డ జన్మించిన విషయం తెలిసిందే. దీంతో.. మెగా ఫ్యామిలీలో సంబరాలు మిన్నంటాయి. మెగా ప్రిన్సెస్‌ వచ్చిందంటూ అభిమానులు కూడా ఆనందం వ్యక్తం చేశారు. జూన్‌ 20న తెల్లవారుజామున 1:49 గంటలకు మెగా ప్రిన్సెస్‌ ఈ ప్రపంచంలోకి అడుగుపెట్టింది. పాప పుట్టిన రెండ్రోజుల పాటు అభిమానులు, సెలబ్రిటీల నుంచి చరణ్ దంపతులకు శుభాకాంక్షలు వెల్లువెత్తాయి. సోషల్‌ మీడియాలోనూ రెండ్రోజులు మెగా ప్రిన్సెస్‌ హవానే కనిపించింది. దేశవ్యాప్తంగా ఈ న్యూస్‌ ట్రెండ్‌ అయ్యింది. అయితే.. మరోసారి మెగా ప్రిన్సెస్‌ గురించి వార్తలు చక్కర్లు కొడుతున్నాయి. ముకేశ్‌ అంబానీ చరణ్‌ కూతురికి స్పెషల్‌ గిఫ్ట్‌ పంపారు.

రామ్‌చరణ్‌-ఉపాసన దంపతుల ముద్దుల కూతురు మెగా ప్రిన్సెస్‌కు సెలబ్రిటీల నుంచి ఆశీర్వాదాలతో పాటు బహుమతులు కూడా అందుతున్నాయి. ఈ క్రమంలోనే ప్రపంచ కుబురేల్లో ఒకరైన రిలయన్స్‌ ఇండస్ట్రీస్ అధినేత ముకేశ్‌ అంబానీ ఒక స్పెషల్‌ కాస్ట్‌లీ గిఫ్ట్‌ పంపారు. ఇప్పుడీ వార్త దేశవ్యాప్తంగా సెన్సేషన్‌ అవుతోంది. మెగా ప్రిన్సెస్‌కు అంబాని బంగారు ఊయల బహుమతిగా పంపారట. ఆయన పంపిన ఊయల 2 కేజీలకు పైగా బంగారంతో తయారు చేయించారని వార్తలు వినిపిస్తున్నాయి. బంగారు ఊయల కోసం రూ.1.20 కోట్లు వరకు ఖర్చు చేశారని చెబుతున్నారు. మెగా ప్రిన్సెస్‌కు జూన్ 30న బారసాల కార్యక్రమం నిర్వహిస్తారు. ఇరు కుటుంబాల సభ్యులతో పాటు సన్నిహితులను మాత్రమే ఈ కార్యక్రమానికి ఆహ్వానించారని తెలుస్తోంది. మెగా ప్రిన్సెస్‌ బారసాల సందర్భంగానే ముకేశ్‌ అంబాని బంగారపు ఊయల పంపించినట్లు తెలుస్తోంది.