లాపతా లేడీస్‌ అరుదైన ఘనత.. 2025 ఆస్కార్‌కు ఎంపిక

కొద్ది రోజుల క్రితం విడుదలైన బాలీవుడ్‌ సినిమా లాపతా లేడీస్ సంచలన విజయం సాధించిన విషయం తెలిసిందే. బాలీవుడ్ నటుడు అమీర్‌ఖాన్ ఆజీ సతీమణి కిరణ్‌ రావు డైరెక్షన్‌లో ఈ సినిమా తెరకెక్కింది. అయితే.. ఈ మూవీ తాజాగా అరుదైన ఘనతను సాధించింది. ఇండియా నుంచి 2025 ఆస్కార్‌కు ఎంపిక అయ్యింది. ఫిల్మ్ ఫెడరేషన్ ఆఫ్ ఇండియా ఈ విషయాన్ని అధికారికంగా ప్రకటించింది. లాపతా లేడీస్‌ సినిమాలో స్పర్శ్ శ్రీవాత్సవ, నితాన్షి గోయెల్, ప్రతిభ తదితరులు ప్రధాన పాత్రల్లో కనిపించారు.

అయితే.. ఇండియా నుంచి ఆస్కార్‌కు లాపతా లేడీస్‌ సినిమా కచ్చితంగా ఎంపిక అవుతుందనీ ఇటీవల ఓ ఇంటర్వ్యూలో కిరణ్‌ రావు దీమాగా చెప్పారు. ఆమె చెప్పినట్లుగానే 2025 ఆస్కార్‌ అవార్డుల్లో భారత్‌ తరఫున అధికారిక ప్రవేశానికి లాపతా లేడీస్‌ అర్హత సాధించింది. ఆమె నమ్మకం ఇప్పుడు నిజమైంది. దీనిపై బాలీవుడ్ మాత్రమే కాదు.. ఇతర ఇండస్ట్రీల నుంచి సంతోషం వ్యక్తం అవుతోంది. లాపతా లేడీస్‌ ఆస్కార్ వేదికపై మన దేశానికి ప్రాతినిథ్యం వహించాలనేది కిరణ్‌రావుతో పాటు.. తమ యూనిట్‌ అందరి కోరిక అంటూ గతంలో చెప్పిన విషయం తెలిసిందే.

లాపతా లేడీస్‌ సినిమా కథ 2001 కాలానికి చెందినది. గ్రామీణ ప్రాంతానికి చెందిన ఇద్దరు నవ వధువులు రైలు ప్రయాణంలో అనుకోకుండా తారుమారైన సంఘటన ఇతివృత్తంగా ‘లాపతా లేడీస్‌’ని తెరకెక్కించారు. ప్రముఖ నటుడు ఆమిర్‌ ఖాన్‌ నిర్మించారు. సుప్రీంకోర్టు 75 ఏళ్ల వేడుకలో భాగంగా.. అడ్మినిస్ట్రేటివ్‌ భవనంలోని సి- బ్లాక్‌లో గల ఆడిటోరియంలో కూడా ఈ చిత్రాన్ని ప్రదర్శించారు. ఇండియ‌న్ ఫిల్మ్ ఫెస్టివ‌ల్ ఆఫ్ మెల్‌బోర్న్ అవార్డుల్లోనూ లాపతా లేడీస్‌ సినిమా క్రిటిక్స్‌ ఛాయిస్‌ విభాగంలో బెస్ట్‌ ఫిల్మ్‌గా నిలిచింది.