హాట్‌బ్యూటీకి ముందస్తు బెయిల్

పూనమ్ పాండే.. ఈ పేరుకు ప్రత్యేకమైన ఇంట్రడక్షన్ అవసరం లేదు. సినిమా అవకాశాలు పెద్దగా రాకపోయినా.. ఏదో ఒక విధంగా వార్తల్లో నిలుస్తూ ఉంటుంది పూనమ్. ముఖ్యంగా ఆమె చుట్టూ గత కొన్నేళ్లుగా వివాదాలే ఉన్నాయి. తాజాగా పోర్న్ చిత్రాల రాకెట్ కేసులో పూనమ్ పాండేకు సుప్రీంకోర్టులో ఊరట లభించింది. అరెస్ట్ నుంచి ఆమెకు తాత్కాలిక రక్షణ లభించింది. ఈ కేసులో ప్రధాన నిందితుడిగా ఉన్న శిల్పాశెట్టి భర్త రాజ్ కుంద్రా సైతం అరెస్ట్ నుంచి రక్షణ పొందగా.. తనకు కూడా అరెస్ట్ నుంచి రక్షణ కోరుతూ పూనమ్ పాండే బాంబే హైకోర్టులో యాంటిసిపేటరీ బెయిల్ పిటిషన్ దాఖలు చేయగా కోర్టు కొట్టివేసింది. ఆమె సుప్రీంకోర్టును ఆశ్రయించింది. జస్టిస్ వినీత్ శరణ్, జస్టిస్ బీవీ నాగరత్నతో కూడిన సుప్రీంకోర్టు ధర్మాసనం మహారాష్ట్ర సర్కారుకు తాజాగా నోటీసులు జారీ చేసింది. కోర్టు తదుపరి ఆదేశాలు ఇచ్చే వరకు ఆమెకు వ్యతిరేకంగా ఎటువంటి బలవంతపు చర్యలకు దిగొద్దని ఆదేశించింది.

లైంగికంగా అసభ్యకరమైన వీడియోలను పంపిణీ చేస్తున్నారంటూ వివిధ సెక్షన్ల కింద ముంబై సైబర్ సెల్ పోలీసులు రాజ్ కుంద్రాకు వ్యతిరేకంగా కేసు నమోదు చేసి దర్యాప్తు చేస్తున్నారు. ఇదే కేసులో షెర్లిన్ చోప్రాతోపాటు పాండే పేరును కూడా పోలీసులు చేర్చారు. దీంతో అరెస్ట్ నుంచి రక్షణ కోరుతూ వారు న్యాయస్థానాలను ఆశ్రయించారు. గత ఏడాది నవంబర్‌లో పూనమ్ పాండేకు ఉపశమనం కల్పించేందుకు బాంబే హైకోర్టు నిరాకరించింది. హైకోర్టు ఆదేశాలను సవాల్ చేస్తూ ఆమె సుప్రీంకోర్టును ఆశ్రయించారు. ఎఫ్‌ఐఆర్‌లో నటి షెర్లిన్ చోప్రాతో పాటు పాండేను నిందితురాలిగా చేర్చారు. డిసెంబర్ 15న, పోర్న్ ఫిల్మ్ రాకెట్‌కు సంబంధించిన కేసుల్లో ఒకదానిలో అరెస్టు చేయకుండా కుంద్రాకు సుప్రీంకోర్టు 4 వారాల రక్షణ కల్పించింది.

నవంబర్‌లో, పోర్న్ ఫిల్మ్ రాకెట్ కేసులో ముంబై పోలీసులు నమోదు చేసిన ఎఫ్‌ఐఆర్‌కు సంబంధించి కుంద్రా దాఖలు చేసిన ముందస్తు బెయిల్ దరఖాస్తును స్వీకరించడానికి బాంబే హైకోర్టు నిరాకరించింది. దీంతో కుంద్రా సుప్రీంకోర్టును ఆశ్రయించారు. కుంద్రా, మొదట సెషన్ కోర్టు నుండి ముందస్తు బెయిల్ కోరాడు, అక్కడ కూడా ఎటువంటి రక్షణ దొరకలేదు. ఆ తర్వాత, తనను ఇరికించారని పేర్కొంటూ బాంబే హైకోర్టును ఆశ్రయించాడు. ముంబై పోలీసుల సైబర్ సెల్ కుంద్రాపై భారతీయ శిక్షాస్మృతి, మహిళల అసభ్య ప్రాతినిధ్యం (నివారణ) చట్టం, మరియు సమాచార సాంకేతిక చట్టం సెక్షన్ల కింద లైంగిక అసభ్యకరమైన వీడియోలను పంపిణీ చేశారనే ఆరోపణలపై కేసు నమోదు చేసింది. ఆరోపించిన అక్రమ వీడియోల కంటెంట్ సృష్టి, ప్రచురణ లేదా ప్రసారంతో తనకు సంబంధం లేదని కుంద్రా పేర్కొన్నారు. యాప్ ద్వారా పోర్న్ చిత్రాలను పంపిణీ చేశారనే ఆరోపణలతో గత ఏడాది జూలైలో ముంబై పోలీసులు అతన్ని అరెస్టు చేశారు. సెప్టెంబర్‌లో కుంద్రాకు బెయిల్ మంజూరైంది.