ట్రిపుల్ సెంచరీతో పాక్ బౌలర్లను చీల్చి చెండాడిన వార్నర్..!
By న్యూస్మీటర్ తెలుగు Published on 30 Nov 2019 8:26 AM GMTపాక్తో జరుగుతున్న రెండో టెస్టులో ఆస్ట్రేలియా భారీ స్కోరు దిశగా పయనిస్తోంది. రెండో రోజు 302/1 ఓవర్ నైట్ స్కోరుతో ఆస్ట్రేలియా ఇన్నింగ్స్ ఆరంభించింది. తొలి రోజు ఆటలో సెంచరీ పూర్తి చేసుకున్న డేవిడ్ వార్నర్.. రెండో రోజు కూడా అదే దూకుడును కొనసాగించాడు. పనిలో పనిగా తన కెరీర్ లో మొదటి ట్రిపుల్ సెంచరీ (335, 39x4, 1x6 )ని పూర్తిచేసుకున్నాడు. 166 పరుగుల ఓవర్నైట్ స్కోరుతో ఇన్నింగ్స్ కొనసాగించిన వార్నర్.. దాటిగా ఆడి ట్రిపుల్ సెంచరీ నమోదు చేశాడు.
ఇదిలావుంటే.. ఓపెనర్ జో బర్న్స్ తొలి వికెట్గా వెనుదిరిగిన తర్వాత క్రీజ్లోకి వచ్చిన లబూషేన్.. వార్నర్కు చక్కటి సహకారం అందించాడు. వార్నర్-లబూషేన్ల జోడి 361 పరుగుల భారీ భాగస్వామ్యాన్ని నెలకొల్పారు. వీరిద్దరూ తొలి టెస్టులో కూడా సెంచరీలు బాదారు. అదే జోరును రెండో టెస్టులో కూడా కంటిస్యూ చేశారు. వార్నర్ త్రిశతకంతో భారీ స్కోరు సాధించిన ఆస్ట్రేలియా.. 589/3 వద్ద తొలి ఇన్నింగ్సును డిక్లేర్ చేసింది. అనంతరం మొదటి ఇన్నింగ్సును ప్రారంభించిన పాక్కు ఆదిలో ఎదురుదెబ్బ తగిలింది. 3 పరుగుల వద్ద ఓపెనర్ ఇమామ్ ఉల్ హక్ వికెట్ను కోల్పోయింది.